Բնակարանաշինության ծրագրով մենք իրականացնում ենք կառավարության որդեգրած քաղաքականությունը՝ սոցիալապես անապահով ընտանիքների բնակարանային պայմանների բարելավման ուղղությամբ:
Շարունակվելու են բնակապահովման և բնակարանային պայմանների բարելավման պետական ծրագրերի իրականացումը. Կարեն Շահրամանյան
ՍՏԵՓԱՆԱԿԵՐՏ, օգոստոսի 1, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այս մասին այսօր հրավիրած մամլո ասուլիսում հայտնել է ԱՀ քաղաքաշինության նախարար Կարեն Շահրամանյանը:
«Մասնավորապես ծնելիության և բազմազավակության խթանման ծրագրի շրջանակներում՝ շուտով կավարտվի թվով 61 ընտանիքի համար նախատեսված նորակառույց առանձնատների շինարարությունը»,- ասել է Կ. Շահրամանյանը, հավելելով, որ ևս 26 առանձնատան շինարարություն դեռ շարունակվում է:
Անդրադառնալով զոհված ազատամարտիկների ընտանիքների բնակարանների վերանորոգման ուղղությամբ տարվող աշխատանքներին՝ Կ. Շահրամանյանը նշել է, որ ավարտական փուլում են թվով 21 բնակելի տան վերանորոգման աշխատանքները, իսկ ևս 20 առանձնատան շինարարությունը դեռ շարունակվում է:
«Մայրաքաղաքում ևս շարունակվում են զոհված ազատամարտիկների ընտանիքների բնակարանների վերանորոգման աշխատանքները, և թվով 37 ընտանիքի հատկացվել են անհրաժեշտ ֆինանսական միջոցներ՝ բնակարանների վերանորգման նպատակով»,- ընդգծել է Կ. Շահրամանյանը:
Նա նաև նշել է, որ մայրաքաղաքի Ա. Մանուկյան 120 հասցեում գտնվող հանրակացարանի կապիտալ վերակառուցման աշխատանքները շարունակվելու են, և այս տարի ևս 30 բնակարան կհանձնվի շահագործման:
Կ. Շահրամանյանը նաև հայտնել է, որ այժմ քննարկումներ են ընթանում Քաշաթաղի շրջանի Աղավնո համայնքում ևս 20 բնակելի առանձնատների կառուցման հարցի շուրջ:
