«Օգոստոսի 17-ին ՀՀ կառավարության գործունեության 100-րդ օրվա առթիվ կազմակերպված հանրահավաքին Արցախից ավելի քան 1000 մարդու մասնակցությունը ապահովվել է առանց պետական միջոցներից մեկ լումա ծախսելու»։
«Արցախը «հակահեղափոխական» կենտրոն ներկայացնելուն «լծված» գործիչները հակազգային մարդիկ են». Արթուր Թովմասյան
ՍՏԵՓԱՆԱԿԵՐՏ, օգոստոսի 21, ԱՐՑԱԽՊՐԵՍ: Այս մասին «Առաջին լրատվական»-ի հետ զրույցում ասաց Արցախի «Ազատ հայրենիք» կուսակցության «Հայրենիք» խորհրդարանական խմբակցության ղեկավար Արթուր Թովմասյանը՝ անդրադառնալով Վահան Բադասյանի հարցազրույցին, որտեղ վերջինս նման պնդում է արել:
«Վահանը չճշտված տեղեկություն է տարածել գուցե ոգևորությունից կամ իր խոսքին հատուկ հնչողություն տալու համար: Դա անընդունելի մոտեցում է: Այո, «Ազատ հայրենիք» կուսակցության երիտասարդական թևը սատարել է հասարակական նախաձեռնությանը, և անդամավճարներից ու նվիրատվություններից գոյացած գումարով մենք աջակցել ենք դրան: Անձամբ ես և մեր խմբակցության մի քանի պատգամավորներ ևս նրանց հետ մեկնել ենք Երևան»,- նշեց Արթուր Թովմասյանը:
Անդրադառնալով ԱՀ առաջին և ՀՀ երկրորդ նախագահ Ռոբերտ Քոչարյանին ազատ արձակելու համար ՀՀ գլխավոր դատախազին Արցախի խորհրդարանի 15 պատգամավորների ստորագրությամբ ներկայացրած խնդրագրին՝ Արթուր Թովմասյանը նշեց, որ ինչպես Վահան Բադասյանի, այնպես էլ շատերի կողմից գիտակցված և չգիտակցված ձևով այդ փաստը մանիպուլյացիայի է ենթարկվում: «Ցանկացած գրագետ մարդ պետք է հասկանա, որ այդ խնդրագրով արցախցի խորհրդարանականները չեն ասել, թե Ռոբերտ Քոչարյանը Մարտի 1-ի գործով մեղավոր է կամ մեղավոր չէ: Եվ ո՛չ Վահան Բադասյանը, ո՛չ էլ Արթուր Թովմասյանն իրավունք չունեն նախապես մեղավորներ նշանակելու: Մենք ընդամենը այդ նամակով խնդրել էինք մինչև դատաքննության ավարտը կալանքից ազատել Ռոբերտ Քոչարյանին: Մենք վստահում ենք ՀՀ արդարադատությանը, և մեզ «անխնա» քննադատողներին խորհուրդ կտայի, որպեսզի իրենք էլ վստահեն, և ոչ թե դատավորների ու դատախազների դերում հանդես գան»,- ասաց «Հայրենիք» խմբակցության ղեկավարը:
Արթուր Թովմասյանը հակազգային համարեց Արցախը «հակահեղափոխական» կենտրոն ներկայացնելուն «լծված» մի շարք գործիչների հայտարարությունները: Նրա խոսքերով՝ նման անպատասխանատու հայտարարությունները ազգի երկու հատվածների միջև տարանջատման լուրջ վտանգներ են պարունակում: «Գուցե դրա խորությունը նրանք մինչև վերջ չեն հասկանում, կամ նրանց հետաքրքիր չէ, բայց մենք, որպես Արցախի ժողովրդի ամենաշատ վստահությունը ստացած քաղաքական ուժ, թույլ չենք տալու որևէ մեկին ապակայունացման որևէ փորձ անելու: Արցախը Հայաստան է, և մեր միասնությունը ոչ ոք չի կարող կասկածի տակ դնել»,- ընդգծեց մեր զրուցակիցը:
