Այսօր՝ օգոստոսի 25-ին, «Արցախի կույրերի միավորում» հասարակական կազմակերպությունը հրավիրել է արտահերթ համագումար:
«Արցախի կույրերի միավորում» հասարակական կազմակերպության նախագահ է ընտրվել Արտակ Բեգլարյանը
ՍՏԵՓԱՆԱԿԵՐՏ, օգոստոսի 25, ԱՐՑԱԽՊՐԵՍ: «Արցախպրես»-ի թղթակցի հաղորդմամբ, ի թիվս այլ հարցերի, համագումարի օրակարգային հարցերից էին միության նոր կանոնադրության ընդունումը, ինչպես նաև խորհրդի կազմի, վերստուգիչ հանձնաժողովի անդամների և կազմակերպության նախագահի ընտրությունները:
Նախ, միավորման անդամ, ԱՀ Մարդու իրավունքների պաշտպանի աշխատակազմի դեպարտամենտի ղեկավար Արտակ Բեգլարյանը, ներկայացնելով նոր կանոնադրությունը, իր խոսքում ասաց, որ դրա մշակման կարիքը առաջացել էր՝ հաշվի առնելով նախորդ կանոնադրությունում առկա որոշակի հակասությունները, այդ թվում և «Հասարակական կազմակերպությունների մասին» ԱՀ օրենքի նկատմամբ:Նոր կանոնադրությունը որոշակի քննարկումներից հետո հաստատվեց միաձայն, որից հետո կայացավ կազմակերպության նախագահի բաց ընտրությունը, և նախագահ միաձայն ընտրվեց Արտակ Բեգլարյանը: Վերջինս իր ելույթում ասաց, որ իր համար առանձնակի կարևորություն է ունենալու միավորման անդամների կարողությունների զարգացման հարցը: «Շատ կարևոր է մեր միության անդամների զբաղվածության խնդրի լուծումը, սակայն ոչ թե ժամանցի, այլ աշխատանքի ապահովմամբ: Բացի այդ, մենք պետք է ունենանք նաև զարգացման հստակ ծրագրեր, կարողանանք սովորել տարբեր հմտություններ, դրանք կիրառելով և արդյունքում լուծելով նաև զբաղվածության ապահովման խնդիրները»,- նշեց Ա. Բեգլարյանը, հավելելով, որ միավորման աշխատանքները պետք է իրականացվեն ավելի կազմակերպված և թափանցիկ:
Նա նաև ընդգծեց, որ միավորման բոլոր անդամները պետք է հնարավորինս մասնակցեն կազմակերպվող ծրագրերին ու աշխատանքներին, ներկայանալով նաև սեփական նախաձեռնություններով:
Համագումարին ներկա ԱՀ սոցիալական հարցերի և վերաբնակեցման նախարարության ընտանիքների կարիքավորության գնահատման և սոցիալական աջակցության վարչության պետ Սամվել Իսրայելյանն իր ելույթում ասաց, որ ողջունում է կազմակերպության նոր նախագահի ընտրությունը: «Չեմ կասկածում, որ Ա. Բեգլարյանի գլխավորությամբ միավորումը լիարժեք հիմքերի վրա է դրվելու և գործելու է ավելի կազմակերպված: Մենք նույնպես փորձելու ենք կազմակերպել և իրագործել տարբեր ծրագրեր, ինչի համար ակնկալելու ենք ձեր ակտիվությունը»,- նշեց Ս. Իսրայելյանը:
Համագումարի վերջում բաց քվեարկությամբ ընտրվեցին նաև միավորման խորհրդի և վերստուգիչ հանձնաժողովի անդամները:
