ՍՏԵՓԱՆԱԿԵՐՏ, սեպտեմբերի 18, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ միջոցառմանը Գրիգոր Նարեկացի համալսարանի ռեկտոր, ԱՀ Գրողների միության նախագահ Վարդան Հակոբյանն ասել է, որ Արկադի Թովմասյանը բանաստեղծ է, ով մշտապես ունեցել է իր ընթերցողը:

«Սա շատ կարևոր դեր ունի գրողի համար: Լատինական առածն ասում է, որ ամեն գիր ունի իր ճակատագիրը:

Եվ այն գրական ավանդը, որ ստեղծել է Արկադի Թովմասյանը, տեսանելի է մեր ժամանակների համար իր պատկերով և մտածողությամբ: Իր ստեղծագործությունները նա գեղարվեստորեն դարձնում է երևույթ:

Բանաստեղծությունը սինթեզ է գիտության և գեղարվեստի միջև: Հենց դրանով էլ առաջնորդվում է Ա. Թովմասյանը»,- նշել է Վ. Հակոբյանը:

Միջոցառմանը ներկա բանաստեղծ, «Հայրենյաց պաշտպան» և «Շուշի» թերթերի խմբագիր Ռոբերտ Եսայանն էլ ասել է, որ Ա. Թովմասյանը նուրբ հոգեաշխարհ ունեցող բանաստեղծ է:

«Այդ հոգեաշխարհից ալիքվում են նրա ցավն ու տառապանքը: Եվ ցավից ու տառապանքից ալիքվում է նրա պոեզիան: Չնայած նրա բանաստեղծությունները  վերաբերում են կյանքի ցավոտ երևույթներին՝ այնուամենայնիվ ընթերցողներին չեն վհատեցնում: Ա. Թոմվասյանի հանրահռչակ բանաստեղծություններից է «Սայլակներով պար»-ը, որտեղ նկատելի են այնպիսի նրբերանգներ, որոնք պոեզիայի խորքից ալիքներով հասնում են ընթերցողին: Նա փորձում է պատերազմը ներկայացնել նորովի: Բանաստեղծը որոնում է նոր ասելիք և պատմության սրբագրության մեջ արտահայտում ազատության տենչը»,- ավելացրել է Ռ. Եսայանը:

Հոբելյարը՝ Ա. Թովմասյանն էլ նշել է, որ 70 տարին ակնթարթ է թվում, երբ օրերդ իմաստնացած են լինում:

«Մարդը պետք է սիրի իր ապրած տարիները, և այդ տարիների հեռվից իմ մեծագույն նվաճումն եմ համարում նահատակ հերոս տղաների նվիրումի գովերգումը: Նրանց է նվիրված իմ ստեղծագործությունների մեծ մասը: Բանաստեղծի ամենամեծ երջանկությունն այն է, երբ դիմացինդ քեզ հետ խոսում է քո տողերով: Ես իմ ընթերցողի հետ հաղորդակցվում եմ այդպես»,- մանրամասնել է Ա. Թովմասյանը:

Ցերեկույթին ներկա Ա. Թովմասյանի գրող-հրապարակախոս ընկերներն անդրադարձել են նրա ստեղծագործական ուղուն, հանդես եկել ելույթներով: