Համաշխարհային շուկայում ադրբեջանական նավթի գինը շարունակում է սրընթաց անկումը:
Ադրբեջանական նավթի գինն ընկել է` հասնելով 62 դոլարի
ՍՏԵՓԱՆԱԿԵՐՏ, 15 ԴԵԿՏԵՄԲԵՐԻ, ԱՐՑԱԽՊՐԵՍ։ «Արմենպրես»-ի փոխանցմամբ՝ Ադրբեջանի պետական նավթային ընկերությունը fins.az-ին հայտնել է, որ դեկտեմբերի 12-ին Լոնդոնի ապրանքային սակարանում Azeri Light տեսակի նավթի մեկ բարելը վաճառվել է 62,94 դոլարով, ինչը 2,16 դոլարով ցածր է դեկտեմբերի 10-ին գրանցված գնից:
Նյու Յորքի NYMEX ապրանքային սակարանում դեկտեմբերի 14-ին անցկացված առեւտրային գործարքներում WTI նավթի մեկ բարելի գինը կազմել է 58,24 դոլար: Լոնդոնի ICE սակարանում Brent տեսակի նավթի մեկ բարելի գինը կազմել է 62,46 դոլար:
Արաբական Միացյալ Էմիրությունների նավթի արդյունաբերության նախարար Սուխաիլ ալ Մազուրին Դուբայում հայտարարել է, որ OPEC-ը (նավթ արդյունահանող երկրների միություն) առաջիկա երեք ամիսներին մտադիր չէ նվազեցնել նավթի արդյունահանման ծավալները, եթե անգամ նրա մեկ բարելի գինը համաշխարհային շուկայում հասնի 40 դոլարի:
«Մենք չենք փոխելու մեր դիրքորոշումը նավթի գների հետագա անկման դեպքում: Մենք չենք պատրաստվում ազդել գների վրա: Շուկան պետք է ինքն իրեն կարգավորվի», -ասել է ալ Մազուրին:
Ադրբեջանի 2014 թվականի պետական բյուջեում նավթի մեկ բարելի գինը նախատեսված է 100 դոլար, իսկ 2015 թվականի պետբյուջեում` 90 դոլար:
