Նոյեմբերի 25-ին Բելառուսի մայրաքաղաք Մինսկում կայանալիք «Մանկական Եվրատեսիլ» միջազգային երգի մրցույթում Հայաստանը կներկայացնի արցախցի Լևոն Գալստյանը (բեմական անունը L.E.V.O.N):
Լևոնը կլինի «Մանկական Եվրատեսիլ» միջազգային մրցույթի ֆավորիտներից մեկը. Լիրա Քոչարյան
ՍՏԵՓԱՆԱԿԵՐՏ, սեպտեմբերի 24, ԱՐՑԱԽՊՐԵՍ: «Արցախպրես»-ի թղթակցի հետ զրույցում «Արցախի ձայներ» երաժշտական նախագծի գեղարվեստական ղեկավար Լիրա Քոչարյանն ասել է, որ իրենք այժմ աշխատանքներ են տանում, որ Լևոնը հարմարվի եվրոտեսիլյան բեմին, լուսային և տեխնիկական հնարավորություններին, նկարահանումներին:
Խոսելով կայանալիք մրցույթի սպասելիքներից՝ մեր զրուցակիցը մասնավորապես ասել է. «Մենք այժմ գտնվում ենք ամենակարևոր փուլում: Կարող եմ հավաստիացնել, որ Լևոնը կլինի մրցույթի ֆավորիտներից մեկը: Մենք կներդնենք մեր ողջ ներուժը՝ մրցույթում հաղթելու համար: Հաղթանակ գրանցելու համար անհրաժեշտ է ունկնդիրների ակտիվ քվեարկություն: Այդ հարցում մեզ անհրաժեշտ է լինելու Սփյուռքի մեր հայրենակիցների աջակցությունը: Ի դեպ, կուզենայի, որ 2010 թվականին Մինսկում կայացած մանկական Եվրատեսիլ մրցույթում Հայաստանը ներկայացնող իմ սաներից Վլադիմիր Արզումանյանի գրանցած հաջողությունը փոխանցվեր Լևոնին»:
Տեղեկացնենք, որ մրցույթին մասնակցությունը պաշտոնապես հաստատել է 19 երկիր՝ Հայաստան, Ալբանիա, Ավստրալիա, Ադրբեջան, Բելառուս, Ֆրանսիա, Մակեդոնիա, Վրաստան, Իռլանդիա, Իսրայել, Իտալիա, Ղազախստան, Մալթա, Լեհաստան, Պորտուգալիա, Ռուսաստան, Սերբիա, Նիդեռլանդներ, Ուելս։
