ՍՏԵՓԱՆԱԿԵՐՏ, սեպտեմբերի 25, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ հռչակագրի ստորագրման առթիվ Բերձոր են ժամանել Ալֆորվիլ քաղաքի պատվիրակությունը՝ ի դեմս քաղաքապետ Միշել Ժերշինովիչի, և ԱՀ արտաքին գործերի նախարար Մասիս Մայիլյանը:

Հյուրերին Բերձոր քաղաքի մուտքի մոտ դիմավորել են աղուհացով:

Այնուհետև նրանք ծաղիկներ են խոնարհել Բերձորի՝ արցախյան պատերազմում զոհված ազատամարտիկների հիշատակը հավերժացնող հուշահամալիրում:

Հռչակագիրը վերաստորագրվել է Ալֆորվիլի քաղաքապետ Միշել Ժերշինովիչի և Բերձորի քաղաքապետի պաշտոնակատար Անահիտ Չարչյանի կողմից:

Միջոցառմանը ներկա Միշել Ժերշինովիչը նշել է, որ այն ստորագրվել էր 2017 թվականի նոյեմբերի 20-ին Ալֆորվիլում՝ ԱՀ Նախագահ Բակո Սահակյանի ներկայությամբ:

«Ալֆորվիլը ստեղծվել է 133 տարի առաջ և բարգավաճել է մեր հայ ընկերների շնորհիվ ևս: Այստեղ ապրող հայկական համայնքի ներկայացուցիչները շարժիչ ուժ են հանդիսանալու հետագայում համագործակցությունն ընդլայնելու համար: Ստորագրելով հռչակագիրը՝ մենք միաժամանակ մոտենում ենք Արցախին: Այս հռչակագրի ստորագրումը մեզ պարտավորեցնում է իրականացնել համընդհանուր ծրագրեր՝ մշակույթի, տնտեսության, սպորտի բնագավառներում»,- ասել է Մ. Ժերշինովիչը:

Իր հերթին Բերձոր քաղաքի քաղաքապետի պաշտոնակատար Անահիտ Չարչյանն ասել է, որ հռչակագիրը կնքվում է մարդկային ամենաբարձր զգացմունքների՝ բարության, արժանապատվության, մարդասիրության և հավատարմության հիման վրա:

«Վստահ եմ, որ հռչակագրի վերաստորագրումը հնարավորություն կտա ավելի ամրապնդելու արդեն եղած բարեկամական կապերը, ավելի մոտիկից ճանաչելու և ավելի շատ սիրելու միմյանց: Կարծում եմ՝ մարդկային շփումներից զատ, մենք կունենանք ընդհանուր հետաքրրքություն ներկայացնող բազմաթիվ ոլորտներ, որտեղ կարող ենք համագործակցել, կատարել փորձի փոխանակում, իրացնել զարգացման համատեղ ծրագրեր: Միշտ սիրով և հյուրընկալ կսպասենք Ալֆորվիլ քաղաքի ցանկացած պաշտոնյայի, բնակչի այցելությանը Արցախ, մասնավորապես՝ Բերձոր»,- նշել է Ա. Չարչյանը:

ԱՀ արտաքին գործերի նախարար Մասիս Մաիլյանն էլ ասել է, որ հռչակագրի ստորագրումն Արցախում վերահաստատելու փաստը շատ կարևոր նշանակություն ունի, քանի որ մեր արտաքին քաղաքականության առաջնահերթություններից է համարվում Արցախի միջազգային ճանաչումը:

«Սա ապակենտրոնացված համագործակցության մի դրսևորում է: Այն ծրագրերը, որոնց այսօր անդրադարձել ենք, պետք է միասին կյանքի կոչենք: Այս համագործակցությունն ունի թե՛ քաղաքական բաղադրիչ, որը հնարավորություն է տալիս ապամեկուսացնել Արցախը և թե՛ գործնական բաղադրիչ, որը պետք է բարելավի բերձորցիների ամենօրյա կյանքը»,- ընդգծել է Մ. Մաիլյանը:

Միջոցառմանն Ալֆորվիլ քաղաքի նախկին քաղաքապետ, Ֆրանսիայի ԱԺ պատգամավոր, Ֆրանսիա-Արցախ բարեկամության շրջանակի անդամ Լյուկ Կարվունասն էլ ասել է, որ իրենք Արցախում եղել են նաև 2016 թվականին:

«Մենք եկել ենք Արցախ, և սա նշանակում է, որ մեր այցով մենք ցուցաբերել ենք նաև քաղաքական աջակցություն: Գոյություն ունի պատմական իրականություն, որը ցույց է տալիս, որ Արցախը հայկական է: Մենք կանենք հնարավորը ձեր ձայնը լսելի դարձնելու համար»,- ավելացրել է Լյուկ Կարվունասը:

Բերձորում հյուրերն այցելել են նաև Քաշաթաղի պատմաերկրագիտական թանգարան, ծանոթացել Արցախի պատմությանը: