ՍՏԵՓԱՆԱԿԵՐՏ, հոկտեմբերի 2, ԱՐՑԱԽՊՐԵՍ: Եկեղեցում   հոգեհանգստյան  կարգը    կատարել    է  Ստեփանակերտի  Սուրբ  Հակոբ  եկեղեցու      հոգևոր հովիվ Տեր Մինաս քահանա  Մովսիսյանը:

Արարողությանը  ներկա  էին  ԱՀ  Ազգային  ժողովի  նախագահ  Աշոտ  Ղուլյանը,  ԱՀ  մշակույթի,  երիտասարդության  հարցերի  և  զբոսաշրջության  փոխնախարար  Գայանե  Գրիգորյանը,  Արցախի   գրողների միության  և  հասարակական  երիտասարդական    կազմակերպության  անդամներ,  ուսանողներ, դասախոսներ,   դպրոցականներ  և  այլք:

Հոգեհանգստյան  կարգից  հետո      միջոցառման   մասնակիցները   քայլերթով  հասել  են   մինչև  Ստեփանակերտի  Շառլ  Ազնավուրի  անվան  մշակույթի   կենտրոնի  տարածքում  գտնվող  ֆրանսիական   պուրակում   տեղադրած   «Հավերժություն»   քանդակի  մոտ:  

 

Այնտեղ   ներկաները  մեծ  հայի  հիշատակին   ծաղիկներ  են  խոնարհել,  կատարել  մոմավառություն:

«Արցախպրես»-ի  թղթակցի    հետ  զրույցում   ԱՀ  Ազգային  ժողովի  նախագահ   Աշոտ  Ղուլյանը,  խոսելով   Շառլ  Ազնավուրի  մասին,  ասել  է, որ  մեծ   հանճարն   իր   ամբողջ   գործունեությունը   ծառայեցրել  է  բոլոր   ժողովրդներին՝ հոգով  միշտ  մնալով   հայ:

«Նա  կարողացել  է  իր  անվան   շուրջ  ստեղծել   համամարդկային  մի  տարածություն, որտեղ   գերիշխել  է  երգը,  սերը  և  հարգանքը: Մեծ  է նրա  կորուստը   բոլորիս  համար, սակայն   նրա  երգերը  ինչ-որ  տեղ   լրացնելու  են   նրա  ֆիզիկական   բացակայությունը»,-ավելացրել  է  Ա. Ղուլյանը:

Իսկ  ԱՀ  մշակույթի, երիտասարդության  հարցերի  և  զբոսաշրջության  փոխնախարար  Գայանե  Գրիգորյանի   խոսքով՝  համաշխարհային  մշակույթի  հանճար և   համամարդկային  բարձր  արժեքներ   կրող   Շառլ  Ազնավուրը բոլորի   կողմից  հարգված  կմնա    դարեր  շարունակ: 

«2009  թվականին,  երբ  Շառլ  Ազնավուրն     այցելել  է Արցախ,  ես  բախտ  եմ  ունեցել  տեսնել    ու    լսել  նրան:  Նա   իմ  հուշերում     մնալու  է  հայի  ամենավառ    անհատականությունը: Նա  իր  մարդկային  նկարագրով, հարուստ   ժառանգությամբ  նվաճել  է  շատ-շատ    ժողովրդների  սերն  ու  համակրանքը»,-նշել  է  Գ.  Գրիգորյանը:

Արցախի   պետական  համալսարանի  հանրային  նշանակության   միջոցառումների  պատասխանատու Վահե    Գալոյանն   էլ     ասել է, որ  իր  և  շատ     երիտասարդների        համար   մեծ   պատիվ  է  ունենալ  Շառլ  Ազնավուրի  նման  տաղանդավոր  հայրենակից:

Վ.  Գալոյանն  ավելացրել է  նաև,  որ  ԱրՊՀ-ի   ավելի  քան  400  դասախոսների  և     ուսանողների ինքնաբուխ     այս   հավաքը    խոսում  է    մեծ   շանսոնյեի  հանդեպ  Արցախի   ժողովրդի    պաշտամունքի   հասնող  սիրո  մասին:

Տեղեկացնենք  նաև, որ Հադրութի շրջվարչակազմի աշխատակազմի մշակույթի և երիտասարդության հարցերի բաժնի  նախաձեռնությամբ,   ի  հիշատակ   Շառլ  Ազնավուրի, այսօր  շրջկենտրոնի   Սուրբ   Հարություն եկեղեցում  ևս տեղի  է  ունեցել    հոգեհանգստի կարգ, որից  հետո    մշակույթի կենտրոնի բակում   կատարվել  է  մոմովառություն։