Ստեփանակերտի ամենահներից մեկի՝ Հովհանես Թումանյանի անունը կրող փողոցի տների ճակատների և մայթերի վերականգնման աշխատանքներն իրականացվում են մայրաքաղաքում գործունեություն իրականացնող «Ֆլորենս գարդեն» ՍՊ ընկերության հովանավորությամբ:
Վերականգնվում է Ստեփանակերտի ամենահին փողոցներից մեկի ճարտարապետական տեսքը
ՍՏԵՓԱՆԱԿԵՐՏ, հոկտեմբերի 4, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է ԱՀ քաղաքաշինության նախարարության քաղաքաշինական պետական տեսչության պետ Դավիթ Ավանեսյանը:
Նրա խոսքով՝ շինաշխատանքները սկսվել են 2017 թվականին և իրականացվում են մի քանի փուլերով:
«Պահպանելով փողոցի հին պատմաճարտարապետական տեսքը՝ իրականացվում են նաև մայթեզրերի և պատերի վերանորոգում, ինչպես նաև կատարվում է մայթերի սալվածք: Փողոցում տեղադրվելու են նոր գիշերային լուսարձակներ: Նախատեսված է մայթեզրերի երկայնքով տնկել ծառեր»,-նշել է Դ. Ավանեսյանը՝ ավելացնելով, որ արդյունքում կվերականգնվի Ստեփանակերտի ամենահին փողոցներից մեկի ճարտարապետական տեսքը:
Նա տեղեկացրել է, որ Ստեփանակերտի քաղաքապետարանի ֆինանսավորմամբ մեկ ամիս առաջ արդեն սկսվել են նաև մայրաքաղաքի Հակոբ Հակոբյան և Հովհ. Թումանյան խաչմերուկից մինչև Թումանյան փողոցը հատող մայթերի բարեկարգման աշխատանքներ:
Ըստ մեր զրուցակցի՝ Ստեփանակերտի Հովհ. Թումանյանի անվան փողոցի բարեկարգման աշխատանքները նախատեսված է ավարտին հասցնել մինչև տարեվերջ:
