Սուրբ Թարգմանչաց տոնի առթիվ այսօր Հայ առաքելական Սուրբ եկեղեցու քրիստոնեական դաստիարակության և քարոզչության կենտրոնի նախաձեռնությամբ Ստեփանակերտի Սուրբ Հակոբ եկեղեցու բակից ուխտագնացություն է կազմակերպվել դեպի Մարտունու շրջանի Կաղարծի գյուղի Սուրբ Թարգմանչաց եկեղեցի:
Սուրբ Թարգմանչաց տոնի առթիվ ուխտագնացություն է կազմակերպվել դեպի Կաղարծի
ՍՏԵՓԱՆԱԿԵՐՏ, հոկտեմբերի 13, ԱՐՑԱԽՊՐԵՍ: Ուխտագնացության մասնակիցները եկեղեցում մոմեր են վառել, որից հետո մասնակցել Հայ առաքելական Սուրբ եկեղեցու քրիստոնեական դաստիարակության և քարոզչության կենտրոնի տնօրեն, Ասկերանի շրջանի հոգևոր հովիվ Տեր Մեսրոպ Խունոյանի մատուցած պատարագին:
«Արցախպրես»-ի թղթակցի հետ զրույցում Հայ առաքելական Սուրբ եկեղեցու քրիստոնեական դաստիարակության և քարոզչության կենտրոնի տնօրեն Տեր Մեսրոպ Խունոյանն ասել է, որ Սուրբ թարգմանչաց տոնը նշվում է հոկտեմբերի երկրորդ շաբաթ օրը՝ նվիրված հայ գրերի գյուտին, թարգմանչաց շարժմանը և մշակույթի նշանավոր գործիչներին:
Մեր զրուցակցի խոսքով՝ Թարգմանչաց շարժումը ծավալվել է հայ գրերի ստեղծումից անմիջապես հետո, որի նպատակը երկիրը հունական ազդեցությունից ազատելն էր՝ հայոց դպրոցներ հիմնելու, քրիստոնեական կարևոր գրքերը և այլ երկեր հայերեն թարգմանելու, եկեղեցական ծեսերը հայկականացնելու, ինքնուրույն հայալեզու դպրություն սկզբնավորելու միջոցով: Գրերի գյուտից հետո թարգմանված առաջին գիրքը «Աստվածաշունչ»-ն է, որը համարվել է «Թարգմանությունների թագուհի», իսկ առաջին մեսրոպատառ նախադասությունը՝ «Ճանաչել զիմաստություն և զխրատ, իմանալ զբանս հանճարո»:
Անդրադառնալով Սուրբ Թարգմանչաց տոնին նվիրված ուխտագնացությանը՝ Տեր Մեսրոպ Խունոյանն ասել է. «Ուխտագնացությունն ուխտ կատարելու մի ձև է, որն առաջին քրիստոնյաներից եկած և այսօր էլ իրականացվող ավանդույթ է: Ուխտագնացությունը հոգևոր բարեպաշտական արարողություն է, հոգևոր մի ճանապարհորդություն, որի ընթացքում քրիստոնյան ապաշխարության, ինքնաքննման, ինքնամաքրման միջոցով որդեգրվում է աստվածային կենսապարգև շնորհներին, վերահաստատում իր ուխտն Աստծո հետ, հաղորդակից դառնում Աստծո կենդանի խոսքին ու քրիստոնեական ճշմարտություններին: Ուխտագնացությունն ինքնանպատակ չէ. աստվածաճանաչության ճանապարհին այն անհատին հասու է դարձնում քրիստոնեական հավատալիքներին, սրբավայրերի պատմությանը, հայ ծեսին ու բազմադարյան ավանդույթների արմատներին»: 
Ըստ Տեր Մեսրոպ Խունոյանի՝ վերջին շրջանում հասարակության և եկեղեցու միջև կապն էլ ավելի է սերտանում: Նկատելի է, թե մարդկանց, մանավանդ երիտասարդների, ինչպիսի հոսք կա դեպի եկեղեցի:
Խոսելով ուխտագնացությունից ստացած իր տպավորությունների մասին՝ Հասմիկ Հայրապետյանն ասել է, որ նման միջոցառումները օգնում են, որ իրենք էլ ավելի մոտենան Աստծուն և եկեղեցուն:«Ցանկալի է, որ նման ուխտագնացություններ հաճախակի կազմակերպվեն, որովհետև ամեն անգամ մասնակցելով պատարագին և լսելով հոգևորականների քարոզները յուրաքանչյուրիս մեջ հավատն ու սերն առ Աստված ավելի է ամրանում»,-նշել է Հ. Հայրապետյանը:
Միջոցառմանը մասնակցում էին ԱՀ մշակույթի և երիտասարդության հարցերի նախարարության աշխատակազմի ազգային փոքրամասնությունների և կրոնի հարցերի բաժնի պետ Աշոտ Սարգսյանը, մի խումբ եկեղեցականներ, հավատացյալներ, երիտասարդներ, կաղարծեցիներ:
