Նախատեսում եմ պատրաստել մազերի խնամքի պարագաներ. Լիլիթ Տոնոյան
Ստեփանակերտի Վերածննդի հրապարակում կազմակերպված այս տարվա «Բերքի տոն»-ին Քաշաթաղի շրջանի Գողթանիկ գյուղի բնակչուհի, մասնագիտությամբ կենսաֆիզիկոս Լիլիթ Տոնոյանն առանձին տաղավարում ներկայացրել է իր ձեռքով պատրաստած օրգանական ծագման օճառներ, յուղեր, մաշկի խնամքի քսուքներ և կոսմետիկ այլ պարագաներ:
Նախատեսում եմ պատրաստել մազերի խնամքի պարագաներ. Լիլիթ Տոնոյան
ՍՏԵՓԱՆԱԿԵՐՏ, հոկտեմբերի 14, ԱՐՑԱԽՊՐԵՍ: «Արցախպրես»-ի թղթակցի հետ զրույցում Լիլիթ Տոնոյանն ասել է, որ արդեն մի քանի տարի է, ինչ ինքը մասնակցում է տոնավաճառին:
Նա նշել է, որ հասարակությունը մեծ հետաքրքրություն է ցուցաբերում իր արտադրանքի նկատմամբ:
Ըստ Լ. Տոնոյանի՝ օճառների և կոսմետիկ այլ պարագաների պատրաստման համար անհրաժեշտ հիմնական բույսերն ինքը հավաքում է Գողթանիկ գյուղից:
Նրա խոսքով՝ իր օճառներն ամբողջովին օրգանական են՝ առանց ջերմային մշակման, պատրաստված միայն սառը տեխնոլոգիաներով: Այդպես պատրաստված արտադրանքի օգտակար հատկությունները պահպանվում են:
Խոսելով ապրանքատեսակի որակի, գների և իրացման խնդիրների մասին՝ Լ. Տոնոյանն ասել է. «Բույսերի համադրությունը ես եմ կազմում: Իմ արտադրանքը զուրկ է սինթետիկ քիմիկան նյութերից, բայց առկա են քիմիական օգտակար տարեր: Օճառները պատրաստելուց հետո պետք է այն օգտագործել մեկ ամիս հետո:Հիմնականում պատրաստում եմ պատվիրատուների համար: Կոսմետիկ պարագաների գները կախված են պատրաստուքի քաշից, օգտագործված նյութերի քանակից: Օրինակ, 100 գ քաշ ունեցող օճառներն արժեն 1000-2000 դրամ, իսկ յուղերը՝ 600-3000, դրանք շուկայական գների համեմատ ցածր են: Պատրաստած ապրանքս իրացնում եմ Արցախում և Հայաստանում: Երբ Ֆրանսիայում, Շվեյցարիայում, Իրանում, Լիբանանում մասնակացել եմ տարբեր փառատոնների և ցուցահանդեսների, այնտեղ ևս թողարկածս ապրանքի մի մասը վաճառվել է»:
Մեր զրուցակիցը տեղեկացրել է նաև, որ առաջիկայում ինքը նախատեսում է պատրաստել մազերի խնամքի պարագաներ՝ (շամպուններ) եղինջի պարունակությամբ: