ՀՀ նախագահ Արմեն Սարգսյանը կնոջ Նունե Սարգսյանի հետ երկօրյա այցով գտնվում է Արցախում:
Արցախի նման գեղեցիկ երկիր ես չէի տեսել. ՀՀ նախագահի տիկին (լուսանկարներ)
ՍՏԵՓԱՆԱԿԵՐՏ, հոկտեմբերի 15, ԱՐՑԱԽՊՐԵՍ: Այսօր առավոտյան Նունե Սարգսյանը, ԱՀ առաջին տիկին Անահիտ Սահակյանը և ԱՀ կրթության, գիտության և սպորտի նախարար Նարինե Աղաբալյանն այցելել են Ստեփանակերտի Խաչատուր Աբովյանի անվան N 1 հիմնական դպրոց:
ՀՀ նախագահի կինը դպրոցի տնօրինության հետ շրջել է կրթօջախով՝ ծանոթացել դպրոցի պայմաններին, շփվել աշակերտների և ուսուցիչների հետ: Նունե Սարգսյանը ներկա լինելով աշակերտների պարին դասին, նրանց հետ շուրջպար է բռնել: Նա դպրոցին է նվիրել իր հեղինակած հեքիաթների գրքերից:
Այնուհետև հյուրերը մեկնել են «Սոսե» մանկապարտեզ, որտեղ փոքրիկները նրանց դիմավորել են աղ ու հացով: Նրանք ծանոթացել են մանկապարտեզի շենքային պայմաններին ու հնարավորություններին, շփվել փոքրիկների հետ և ներկա գտնվել Նունե Սարգսյանի արցախի բարբառով թարգմանված «Քաչալ ոզնին» հեքիաթի բեմադրությանը:
Նունե Սարգսյանը մանկապարտեզին ևս նվիրել է իր հեղինակած հեքիաթների գրքերից՝ հույս հայտնելով, որ իր ստեղծագործությունները դաստիարակները կընթերցեն երեխաների համար:
«Արցախպրես»-ի թղթակցի հետ զրույցում Նունե Սարգսյանն ասել է, որ ինքն առաջին անգամ է Արցախում, և իր այցը կրում է ճանաչողական բնույթ:«Արցախի նման գեղեցիկ երկիր ես չէի տեսել: Ամբողջ ճանապարհին հինում էի Արցախի հիասքանչ բնությամբ: Ես շատ եմ հավանել այս չքնաղ երկիրն ու ժողովրդին: Ուզում եմ իմ կապն ավելի ամրապնդել Արցախում ապրող երեխաների հետ: Այցիս ընթացքում ուզում եմ տեսնել ու լսել մարդկանց, ծանոթանալ Արցախի խնդիրներին ու ձեռքբերումներին: Հասցրել եմ լինել Դադիվանքում, իրավամբ, այն կարելի է համարել Արցախի մարգարիտը: Իմ հոգին կապված է արցախցիների հետ և ես կրկին կայցելեմ Արցախ»,-ավելացրել է Ն. Սարգսյանը՝ նշելով, որ այցի ընթացքում ինքը կլինի նաև Շուշիում:
Խոսելով նոր ստեղծագործություններ գրելու մասին՝ Ն. Սարգսյանը տեղեկացրել է, որ այժմ ինքն իր 6-ամյա թոռան հետ աշխատում է «Կապույտ գետաձին և վարդագույն մկնիկը» հեքիաթի վրա, որը շուտով լույս կտեսնի:
Մեր զրուցակիցը հույս է հայտնել, որ իր նոր ստեղծագործությունը ևս կթարգմանվի արցախի բարբառով:
