«Տիգրանակերտ» զորավարժարանում անց է կացվել գումարտակային մարտավարական զորավարժություն
Հայկական երկու հանրապետությունների ռազմական համագործակցության ծրագրի համաձայն, ՊԲ-ում անցկացված հրամանատարական հավաքների կարևորագույն ուսումնամարտական միջոցառումը բանակի «Տիգրանակերտ» զորավարժարանում խաղարկված մարտական հրաձգությամբ ուղեկցվող ցուցադրական գումարտակային մարտավարական զորավարժությունն էր:
«Տիգրանակերտ» զորավարժարանում անց է կացվել գումարտակային մարտավարական զորավարժություն
ՍՏԵՓԱՆԱԿԵՐՏ, հոկտեմբերի 23, ԱՐՑԱԽՊՐԵՍ-ՄԱՐՏԻԿ: Եզրափակիչ փուլին հետևում էին ԱՀ պաշտպանության նախարար, ՊԲ հրամանատար, գեներալ-լեյտենանտ Լևոն Մնացականյանը, ԶՈՒ գլխավոր շտաբի պետի տեղակալ, գեներալ-մայոր Անդրանիկ Մակարյանը, հայկական երկու հանրապետությունների զինված ուժերի բարձրաստիճան հրամկազմի ներկայացուցիչներ:
Իսկ որպես ուսուցանվողներ հրավիրվել էին հրամանատարական հավաքի մասնակիցները: Նախքան մարտական հրաձգության փուլին անցնելը, ծավալված ցուցադրման կետերում ներկայացվել են այն բոլոր առանձնահատկություններն ու մեթոդական հարցերը, որոնք պետք է տեղ գտնեն յուրաքանչյուր նման զորավարժության պլանավորման և անցկացման ժամանակ:
Մասնավորապես անդրադարձ է կատարվել գումարտակային մարտավարական զորավարժության ժամանակ մշակվող մարտական փաստաթղթերին ու պաշտոնատար անձանց պարտականություններին, զորամասերի հրամանատարներին ու նրանց տեղակալներին ներկայացվել են ՊԲ-ում ներդրված նորագույն սարքավորումներն ու մի շարք նոր զինատեսակներ, որոնք նախատեսված են հետախուզության վարման ու տեսադիտարկման իրականացման, մարտավարական նոր հնարքների կիրառմամբ` հակառակորդին առավել մեծ կորուստներ պատճառելու համար: Ընդ որում, հարկ է նշել, որ ներկայացված նորամուծությունները բավականին բարձր արդյունավետությամբ արդեն իսկ կիրառվում են ՊԲ-ում: Գաղտնիության որոշակի նկատառումներից ելնելով, դեռևս հնարավոր չէ հանգամանորեն խոսել ներկայացված նոր զինատեսակների մասին, սակայն առաջ անցնելով նշենք, որ զորավարժության ընթացքում 1-ին անգամ, մարտականին առավելագույնս մոտեցված պայմաններում կիրառվեցին նաև նավարկային տեղորոշման համակարգերից անկախ գործող հարվածային անօդաչու թռչող սարքեր: Ի դեպ նշված անօդաչու թռչող սարքերը նախագծվել ու արտադրվել են Արցախում և մեր երկրի համապատասխան մասնագետների կողմից: Իսկ նախքան գաղտնազերծվելն ու մարտավարական զորախաղերում կիրառվելը, դրանք անցել են բավականին երկարատև փորձաշրջան և լիովին ապացուցել իրենց արդյունավետությունը:
Մարտական հրաձգության փուլի խաղարկման ժամանակ պայմանականորեն մեր ուժերի առաջին դիրք մխրճված հակառակորդին կանգնեցնելու նպատակով յուրային ուժերը զբաղեցնում են կրակային բնագիծ, այնուհետև անցնում հակահարձակման և, զգալի կորուստներ պատճառելով հակառակորդին, վերականգնում առաջնագիծը: Պայմանական մարտի ամբողջ ընթացքում իրականացվել է անընդհատ ղեկավարում, կազմակերպվել արդյունավետ փոխգործակցություն, անձնակազմը գործել է մարտավարական առումով գրագետ ու հասել ցանկալի արդյունքի:
Գումարտակային մարտավարական զորավարժության արդյունքում կատարելագործվել են մասնակից ստորաբաժանումների հրամկազմի գիտելիքներն ու գործնական ունակությունները որոշումների ընդունման, տվյալների նախապատրաստման և հաշվարկների կատարման, ինչպես նաև փոխգործակցության անընդհատ ապահովման և ստորաբաժանումների ղեկավարման գործում, կրտսեր օղակի հրամանատարները հնարավորություն են ստացել զարգացնել որոշումներ ընդունելու և ենթականերին խնդիրներ առաջադրելու կարողությունները, անձնակազմը ձեռք է բերել բարոյամարտական ու կամային բարձր որակներ: Զորավարժության արդյունքները ինչպես ուսումնամեթոդական, այնպես էլ մասնակից ստորաբաժանումների մարտունակության կատարելագործման առումով անչափ բարձր է գնահատել նաև զինված ուժերի գլխավոր շտաբի պետի տեղակալ, գեներալ-մայոր Անդրանիկ Մակարյանը:
Գումարտակային մարտավարական զորավարժությունը հերթական անգամ փաստել է, որ ՊԲ-ում վերջին տարիներին իրականացված ու շարունակվող բարեփոխումները, ռազմատեխնիկական համալրման ու արդիականացման համալիր գործընթացները արդեն իսկ տալիս են շոշափելի դրական արդյունքներ և հակառակորդի հավանական սադրանքների դեպքում ՊԲ-ն ի զորու կլինի լիարժեք ապահովել Արցախի Հանրապետության անվտանգությունը: