ՍՏԵՓԱՆԱԿԵՐՏ, հոկտեմբերի 27, ԱՐՑԱԽՊՐԵՍ: Այս մասին «Արցախի հանրային հեռուստաընկերության»-ը տված հարցազրույցում ասել է ԱՀ քաղաքաշինության նախարար Կարեն Շահրամանյանը՝ մանրամասնելով, որ այս կերպ բնակարանաշինական նոր ծրագրի մեկնարկն է տրվում:

«Կառուցվելիք բնակարանները կլինեն ոչ պակաս հարմարավետ, սակայն առավել մատչելի պայմաններով կտրամադրվեն: Հոկտեմբերի կեսերից նախապատրաստական աշխատանքներն են մեկնարկել: Արդեն սկսվել են քանդման աշխատանքները: Մաքրվում է ընդհանուր տարածքը: Ներկայումս շինարարության համար ընտրված տարածքների սեփականատերերի հետ բանակցություններն են ավարտին մոտենում: Զուգահեռ շարունակվելու են նախագծման աշխատանքները: Դրանք ևս նախատեսվում է ավարտել մինչև տարեվերջ: Շինարարությունը կմեկնարկի հին շինությունների մոնտաժումից անմիջապես հետո»,-նշել է Կ. Շահրամանյանը:

Ոլորտի պատասխանատուի խոսքով՝  բնակելի թաղամասի առաջին տարածքը զբաղեցնում է մոտ 2.5 հա տարածք: Այն գտնվում է Թումանյան փողոցի հարակից տարածքում՝ սպայական թաղամասի հարևանությամբ: Նախատեսվում է հիմնականում ունենալ մինչև 5 հարկանի բնակելի շենքեր՝ մոտ 500 բնակարաններով:

«Առաջին թաղամասը կնախագծի «Պորտալ» ընկերությունը: Արցախից հենց այս կազմակերպությունն է իրականացրել հարևանությամբ գտնվող սպայական թաղամասի նախագծման աշխատանքները: Երկրորդ՝ 3.5 hա տարածքը, գտնվում է Տիգրան Մեծ-Ալեք Մանուկյան խաչմերուկի հարևանությամբ: Դա նախկին փրկարար ծառայության և Ստեփանակերտ քաղաքի լողավազանի տարածքն է: Այս թաղամասի ճարտարապետական նախագիծը կազմելու է ռուսաստանաբնակ Մաքսիմ Աթայանցի ճարտարապետական արվեստանոցը: Հատակագծման ցանկացած աշխատանք Մաքսիմ Աթայանցի հետ քննարկում ենք առցանցի կապի միջոցով: Սա կլինի ուրույն ոճով թաղամաս, հետաքրքիր լուծումներով: Այս փուլում դեռ որոշ մանրամասներ են քննարկվում: Ընդ որում՝ աշխատանքների դիմաց ստացված ամբողջ գումարով Աթայանցն իր հայրենի՝ Հադրութի շրջանի Քարագլուխ  գյուղում ներդրումներ կիրականացնի»,- մանրամասնել է Կ. Շահրամանյանը:

Քաղաքաշինության նախարարն ընդգծել է, որ, հաշվի առնելով, որ այս բնակարանները պետք է հատկացվեն արտոնյալ պայմաններով՝ շուկայականից անհամեմատ ցածր գներով, արվելու է հնարավորը, որպեսզի դրանք ցածր արժեք ունենան: Դա, սակայն, չի ազդելու որակի վրա, ստեղծվելու են բոլոր հարմարությունները: Երկու սենյականոց բնակարանները կունենան մինչև 60 քառակուսի մետր, երեք սենյականոցները՝ 80, չորս սենյականոցները՝ 95 քառակուսի մետր մակերես: