Artsakhpress

Հարցազրույց

Ի՞նչ պայմաններով և ովքե՞ր կարող են օգտվել Արցախում կառուցվող բնակարանների ձեռքբերման նոր ծրագրից

Մայրաքաղաք Ստեփանակերտն առաջիկայում կունենա երկու նոր թաղամաս՝ շուրջ 500 բնակարանով:

Ի՞նչ պայմաններով և ովքե՞ր կարող են օգտվել Արցախում կառուցվող բնակարանների ձեռքբերման նոր ծրագրից

Ի՞նչ պայմաններով և ովքե՞ր կարող են օգտվել Արցախում կառուցվող բնակարանների ձեռքբերման նոր ծրագրից
ՍՏԵՓԱՆԱԿԵՐՏ, հոկտեմբերի 27, ԱՐՑԱԽՊՐԵՍ: Իրականացվող նախագծերի, վերջինիս շահառու դառնալու պայմանների և մի շարք այլ հարցերի շուրջ Արցախի հանրային հեռուստաընկերությունը զրուցել է ԱՀ պետական նախարար Գրիգորի Մարտիրոսյանի հետ:
Հարցազրույցի տեքստային տարբերակն ամբողջությամբ ներկայացնում ենք ստորև՝
- Պարո՛ն Մարտիրոսյան, ծրագրի մասին խոսակցությունները սկսվեցին միանգամից: Ինչպե՞ս առաջացավ գաղափարը, և ո՞վ է ֆինանսավորելու ծրագիրը:
- ԱՀ Նախագահի հանձնարարականով Կառավարությանը հանձնարարվել էր ավելի մատչելի պայմաններ ստեղծել հիփոթեքի և, ընդհանրապես, բնակարանային ապահովության համար: Արդյունքում սահմանեցինք ծրագիր, համաձայն որի՝ Ստեփանակերտ քաղաքում կկառուցվի երկու նոր թաղամաս, ընդհանուր առմամբ, առնվազն 500 բնակարանով, որոնց արժեքը կլինի սոցիալական կամ բյուջետային տարբերակով: Այսինքն կունենանք 15 միլիոն դրամից մինչև 26 միլիոն դրամ արժողությամբ բնակարաններ, որոնք այսօր առկա են երկրորդնային շուկայում՝ հին բնակֆոնդում: Երկու թաղամասերի կառուցման ֆինանսավորման աղբյուրները տարբեր են: Ներգրավվել են օտարերկրյա ներդրողների գումարներ, կլինեն նաև պետական համաֆինանսավորում և վարկային միջոցներ:
Աշխատանքների երկրորդ ուղղությունը հիփոթեքային վարկերի մատչելիության ապահովումն է: Նախատեսում ենք մի փաթեթ, որը տեղ կգտնի հիփոթեքային կարգում և կսկսի գործել 2019 թվականի հունվարի մեկից: Այն պարունակում է մի քանի նորամուծություն: Կարևորագույններից մեկն այն է, որ այսօրվա գործող կարգով պետությունը սուբսիդավորում է վարկի տոկոսագումարի 50 տոկոսը: Մեր կողմից առաջարկվում է սահմանել այնպիսի կարգ, որ ընտանիքում յուրաքանչյուր երեխայի ծննդյան կապակցությամբ տոկոսագումարի սուբսիդավորումն ավելանա ևս 5 տոկոսով:
Արդյունքում կստացվի այնպես, որ 3 երեխա ունեցող ընտանիքը կարող է հիփոթեքային վարկ ստանալ ընդամենը 4-5 % տոկոսադրույքով, որը բավականին մատչելի է: Քանի որ խոսքը վերաբերում է առաջնային շուկային, կշարունակի գործել նաև եկամտային հարկի վերադարձման մեխանիզմը և կստացվի, որ գրեթե անտոկոս վարկի հնարավորություն է ստեղծվում քաղաքացիների համար:
Հաշվի առնելով այն հանգամանքը, որ վարկերը տրամադրվում են բանկերի կողմից, այդ աշխատանքները հիմնականում կիրականացվեն կառավարության կողմից սուբսիդավորման միջոցով:
Գյուղական բնակավայրերում նույնպես մշակել ենք փաթեթներ, որոնց շնորհիվ կկարողանանք տրամադրել 1 % հիփոթեքային փոխառություններ 5 % կանխավճարով:
- Ձեր նշած փոփոխությունները նոր վարկերի դեպքու՞մ են գործելու, թե՞ արդեն գործող վարկային պայմանագրերի պարագայում:
- Նախատեսվում է, որ այդ բոլոր նոր պայմանները տարածվեն նաև նախկինում վարկեր ստացած և նշված պայմանները բավարարող հիփոթեքային վարկերի վրա: Իհարկե, խոսքը միայն առաջնային շուկայի մասին է:
- Պարո՛ն պետնախարար, պայմանները կարծես թե շատերի համար մատչելի են: Նշեցիք, որ կունենանք նվազագույնը 500 բնակարան: Ովքե՞ր են լինելու շահառուները:
- Բնակարանների մի մասը ձեռք կբերվի պետության կողմից, որպեսզի տրամադրվի այն սոցիալական խմբերին, որոնց նկատմամբ պետությունը ստանձնել է բնակտարածքով ապահովելու պարտավորություն: Այդ բնակարանների կառուցումով Ստեփանակերտ քաղաքում կլուծվի երկար տարիներ տևած հերթացուցակների հարցը՝ ներառելով զոհված ազատամարտիկների և բազմազավակ ընտանիքներին, երկկողմանի ծնողազուրկ երեխաներին և առաջին կարգի զինվորական հաշմանդամներին: Բնակարանների մեծ մասը կիրացվի հիփոթեքային վարկավորմամբ: Շահառուներ կարող են լինել բոլոր նրանք, ովքեր սահմանված կարգով համապատասխանում են չափանիշներին: Որոշակի փոփոխություններ կկատարվեն այդ չափանիշներն ավելի մատչելի դարձնելու ուղղությամբ:
- Իսկ ցանկացողները ե՞րբ կարող են սկսել հայտերի հերթագրումը:
- Շինարարությունը կսկսվի շուտով և կավարտվի մոտ 2 տարվա ընթացքում: Նախատեսվում է հնարավորություն ստեղծել մեր քաղաքացիների համար, որպեսզի աշխատանքների ավարտին կարողանան ձևակերպել հիփոթեքային վարկավորման համար անհրաժեշտ փաստաթղթերը: Մենք թիրախավորել ենք այն գաղափարը, ըստ որի ընտանիքը, որտեղ կա միջին աշխատավարձ ունեցող երկու վարձու աշխատող, կարողանա օգտվել հիփոթեքային վարկավորումից: Օրինակ՝ երկու սենյականոց բնակարանի դեպքում ամսավճարը կկազմի շուրջ 60 հազար դրամ, 3 սենյականոց բնակարանի դեպքում՝ 80 հազար դրամ, 4 սենյականոց բնակարանի դեպքում՝ 100 հազար դրամ:
- Մեր քաղաքացիների մեծ մասը կանխավճարը տալու խնդիր ունի: Ինչպե՞ս վարվել այս դեպքում:
- Հիփոթեքային վարկի մատչելիությունը բաղկացած է երկու մասից: Կանխավճարը խնդիր է մնում սկզբնական փուլի համար: Այդ նպատակով մեր կողմից մշակվել է երկու տարբերակ: Առաջին տարբերակի դեպքում կմուծվի 10 տոկոս կանխավճար, և վարկը կձևակերպվի 20 տարով: Ըստ երկրորդ տարբերակի՝ կանխավճար կմուծվի 5 տոկոսի չափով, սակայն վարկի ժամկետը կլինի 15 տարի:
- Էժան լինելու փաստը, ուրախացնելուց բացի, մտավախություն է առաջացնում բնակարանների որակյալ շինարարության առումով: Պարո՛ն Մարտիրոսյան, արդյո՞ք մտավախությունը հիմնավորված չէ:
- Կլինի հսկողություն, որպեսզի անորակ շինանյութերի օգտագործումը բացառվի: Հնարավոր է կահավորման որոշակի համեստ տարբերակ: Դա կվերաբերի ներքին հարդարման փուլին: Գնի էժանացումը չի ենթադրում վատ որակ: Արժեքը ձևավորվում է մի քանի տարրից, այդ թվում՝ հողի, արտաքին բարեկարգման և կոմունիկացիաների գներից: Ծրագրի շրջանակներում նման աշխատանքների իրականացումը պետությունը կվերցնի իր վրա: Հենց դրանց հաշվին կապահովի մատչելիությունը:

     

Քաղաքական

Տնտեսական

Հասարակական

Ռազմական

Ամենադիտված

ամիս

շաբաթ

օր

Սամվել Բաբայանը զառանցում է. Վիտալի Բալասանյանը՝ աղմկահարույց սպանությունների մասին

Ռոբերտ Քոչարյանը ազատ կարձակվի. դատարանն ընդունեց կալանքը փոխելու վերաբերյալ երաշխավորությունը

Ի՞նչ նոր քարտեզի մասին է խոսում Սամվել Բաբայանը. Վիտալի Բալասանյանը հրեշավոր է համարում այդ ծրագիրը

Լևոն Հայրապետյանի ծանր օրերին նախագահ Սահակյանն արել է ամեն ինչ՝ հնարավորն ու անհնարինը․ Արշավիր Ղարամյան

Բակո Սահակյանն ու Արկադի Ղուկասյանը երաշխավորեցին Քոչարյանի ազատության համար. նրանք 500.000–ական դրամ են վճարել

Արցախում ապրող ամեն մի ընտնաիքի համար բնակարան ձեռք բերելը կդարձնենք ավելի մատչելի. Արայիկ Հարությունյան

Հայտնի են «Վերջին զանգ»-ի առթիվ կայանալիք տոնական միջոցառումների օրերը

«Էրեբունի» բժշկական կենտրոնի մի խումբ բժիշկներ Ստեփանակերտում իրականացնում են հետազոտություններ

ՀՀ գլխավոր դատախազի հանձնարարությունը

Search