ՍՏԵՓԱՆԱԿԵՐՏ, հոկտեմբերի 28, ԱՐՑԱԽՊՐԵՍ: «Արցախպրես»-ի թղթակցի հետ զրույցում ուսուցիչներն ասել են, որ իրենց բողոքն ուղղված է տարեսկզբին աշխատանքից ազատված փոխտնօրեն Անահիտ Բաղդասարյանի դեմ, ով դատարանի միջոցով ցանկանում է վերադառնալ դպրոց և աշխատել այդ պաշտոնում:

«Նախկին փոխտնօրենը հավուր պատշաճի չէր ներկայանում դպրոցում, չէր մասնակցում կազմակերպվող միջոցառումներին և ժողովներին, ուսուցչական անձնակազմի հետ հարաբերություններն էլ միշտ չէ, որ հարթ էին ընթանում»,- նշել են նրանք:

Հարցի կապակցությամբ Անահիտ Բաղդասարյանի փաստաբան Վլադիմիր Հայրապետյանը մեզ հետ զրույցում ասել է, որ ուսուցիչների բողոքը նպատակ ունի ազդելու Վերաքննիչ դատարանի որոշման վրա՝ հանրային կարծիք ստեղծելով:

Փաստաբանը նշել է, որ խնդիրը տնօրենի և փոխտնօրենի անձնական տիրույթում է, և ուսուցիչներին ներգրավելը գործի մեջ սուբյեկտիվ բնույթ է կրում:

«Անահիտ Բաղդասարյանի պարզաբանմամբ, վեճը ծագել է այն ամենից հետո, երբ դպրոցի տնօրենն իրեն առաջարկել է տաբելներում գրանցել այն մարդկանց անունները, ովքեր աշխատանքի չներկայանալով հանդերձ աշխատավարձ պիտի ստանան: Դրան ընդդիմացել է փոխտնօրենը, որից հետո իրեն աշխատանքից ազատվելու պահանջ է ներկայացվել»,- ասել է Վ. Հայրապետյանը:

Ի դեպ, Ա. Բաղդասարյանի փաստաբանի կողմից մեզ է տրամադրվել տնօրենի ստորագրությամբ փաստաթղթի պատճենը:

Նրա խոսքով՝ 2018 թվականի հունվարի 8-ին տնօրենի դիրքի չարաշահման պատճառով Ա. Բաղդասարյանը հունվարի 30-ից իրեն աշխատանքից ազատվելու դիմում էր գրել: Հունվարի 9-ին նա հետ է պահանջել դիմումը, սակայն այն չի տրվել՝ պատճառաբանելով, որ նա արդեն ազատված է աշխատանքից: Սակայն գործի քննությունը պարզել է, որ դիմումը մուտքագրվել ոչ թե հունվարի 8-ի, այլ նախորդ տարվա դեկտեմբերի 27-ի ամսաթվով, իսկ դեկտեմբերի 29-ին տրվել է աշխատանքից ազատման հրամանը:

Փաստաբանի պնդմամբ՝ տվյալ դեպքում երկու անգամ խախտվել է օրենքը. նախ՝ տնօրենը ետին թվագրմամբ դիմումը մուտքագրելու իրավունք չի ունեցել, և երկրորդ՝ եթե անգամ դիմումը մուտքագրվել է դեկտեմբերի 27-ին, ԱՀ «Աշխատանքային օրենսգրքի» պահանջների համաձայն՝ պետք է պահպանվեր աշխատանքից ազատելու եռօրյա ժամկետը:

Հայրապետյանի խոսքով՝ Ա. Բաղդասարյանը միաժամանակ ռուսաց լեզվի ուսուցչուհի էր, և մեկ այլ հրամանով նա ազատվել էր նաև այդ պաշտոնից:

«Մենք վիճարկել ենք երկու հրամանները, որպեսզի նա վերադառնա իր աշխատանքին, և ներկայացրել ենք մեր պահանջը՝ գանձել հարկադիր պարապուրդ: ԱՀ Առաջին ատյանի ընդհանուր իրավասության դատարանի որոշմամբ՝ ռուսաց լեզվի ուսուցչի պաշտոնը չի վերականգնվել, փոխարենը վերականգնվել է փոխտնօրենի պաշտոնը: Դրանից ելնելով՝ մենք բողոքարկել ենք Վերաքննիչ դատարան: Դպրոցի տնօրեն Անահիտ Հակոբյանը ևս բողոքարկել է դատական ակտը այն մասով, որ Ա. Բաղդասարյանի աշխատանքի մասամբ վերականգնումը ճանաչվի անվավեր»,- մանրամասնել է Վ. Հայրապետյանը՝ ընդգծելով, որ դատական գործընթացը շարունակվում է, և վճիռը կհրապարակվի հոկտեմբերի 31-ին:

Իր հերթին դպրոցի տնօրեն Անահիտ Հակոբյանն ասել է, որ ֆինանսական հարցերը նախ և առաջ կարգավորվում են հաշվապահի կողմից, իսկ վճարումները՝ կատարվում առցանց ձևով, հետևաբար անհնար է, որ տնօրենը նրան պարտադրեր գրանցումներ անել:

«Նախկին փոխտնօրենի պահվածքի պատճառով ստեղծվել էին լարված հարաբերություններ ուսուցիչների հետ: Անահիտ Բաղդասարյանի հետ վերադառնալուն ես դեմ չեմ: Սակայն կարծում եմ, որ վերադառնալու դեպքում նա պետք է իր աշխատանքը կատարի պատշաճ ձևով, ուսուցիչների հետ անախորժություններ չստեղծի և կոնֆլիկտներ չունենա: Ներկայումս այդ պաշտոնը թափուր է, և փոխտնօրենի աշխատանքային պարտականություններն իրականացնում ենք մենք»,- ասել է Ա. Հակոբյանը:

Հարցի կապակցությամբ ԱՀ կրթության, գիտության և սպորտի փոխնախարար Միքայել Համբարձումյանը նշել է, որ խնդրին տեղյակ են, և ներկայումս ուսուցիչների հետ ընթանում են տարբեր քննարկումներ:

ԱՀ ԿԳՍ փոխնախարարի խոսքով՝ հարցը գտնվում է իրավական հարթության վրա, և հոկտեմբերի 31-ի Վերաքննիչ դատարանի դատավճռից հետո միայն պարզ կլինի՝ նախկին փոխտնօրենը վերադառնալու է իր աշխատանքին, թե ոչ: