Այսօր` հոկտեմբերի 29-ին, Արցախի պետական համալսարանում մեկնարկել են հոգևոր անվտանգությանը վերաբերող դասընթացներ:
ԱրՊՀ-ում մեկնարկել են հոգևոր դասընթացներ
ՍՏԵՓԱՆԱԿԵՐՏ, հոկտեմբերի 29, ԱՐՑԱԽՊՐԵՍ: «Արցախպրես»-ի թղթակցի հաղորդմամբ` դասընթացին բացման խոսքով հանդես է եկել ԱրՊՀ ուսանողների հետ տարվող աշխատանքների գծով պրոռեկտոր Վիտյա Յարամիշյանը` նշելով, որ մայր բուհի և Հայ առաքելական եկեղեցու Արցախի թեմի համագործակցության արդյունքում մեկնարկած դասընթացները տևելու են մեկ շաբաթ:
«Դրանք կազմակերպվել են նաև Երևանի պետական և Խաչատուր Աբովյանի անվան հայկական պետական մանկավարժական համալսարաններում: Դասընթացները ներառելու են արժեքային և ուղղորդիչ հանդիսացող, ինչպես նաև ազգային այն մոտեցումները, որոնք աստվածաշնչյան հոգևոր մեկնաբանության կարիք ունեն»,- ընդգծել է Վ. Յարամիշյանը:
Իր հերթին բանախոս Լորիս սարկավագ Անդրեասյանն ասել է, որ ծրագրի շրջանակներում անդրադառնալու են ազատության, երջանկության, բարության քրիստոնեական ընկալումներին:«Բոլոր թեմաների հիմքում ընկած են սուրբգրային պատումները: Նպատակ ունենք ավելի ակտիվացնել տեղի երիտասարդությանը հոգևոր, կրթական միջոցառումներ ձեռնարկելու ճանապարհին: Ուսանողներն առաջին օրը մեզ ուղղեցին մի շարք հարցեր, ինչը խոսում է նրանց հետաքրքրվածության և պատրաստվածության մասին: Ընդհանրապես, հոգևոր թեմաներով քննարկումներ ծավալելու և Աստծո խոսքի քարոզչության, Սուրբ Գրքի մասին խոսելու կարիք կա բոլոր հաստատություններում: Դասընթացից մեր առաջին ակնալիքն այն է, որ ուսանողը մոտենա Աստծուն, քանի որ հոգևորականի ծառայության գլխավոր առաքելությունը հոգեփրկությունն է: Այդ ճանապարհին սա ուսանողների համար հնարավորություն է, որպեսզի համակողմանի պատկերացում ունենան Սուրբ Գրքի բովանդակության մասին»,- ավելացրել է Լորիս սարկավագ Անդրեասյանը:
