ՍՏԵՓԱՆԱԿԵՐՏ, հոկտեմբերի 30, ԱՐՑԱԽՊՐԵՍ:«Արցախպրես»-ի  թղթակցի  հաղորդմամբ՝   միջոցառմանն  ԱՀ  նախագահ   Բակո  Սահակյանը, ԱՀ  ԱԻՊԾ  տնօրեն   Կարեն  Սարգսյանը, ՀՀ  արտակարգ  իրավիճակների  նախարար  Ֆելիքս  Ցոլակյանը, ԱՀ  պետական  պաշտոնյաներ, հյուրեր  և  ծառայության  աշխատակիցներ ծաղիկներ  են   դրել  ԱԻՊԾ շարահրապարակի   տարածքում  կանգնեցված   խորհրդանշական   խաչքարի  պատվանդանին:

Հանդիսավոր  արարողությանն  ԱՀ  նախագահ  Բակո  Սահակյանը  շնորհավորելով   ԱԻՊԾ   աշխատակիցներին՝  բարձր   է  գնահատել  նրանց  անձնվեր  աշխատանքը:

Խոսելով  կառույցի  կողմից  իրականացվող  աշխատանքների, ինչպես նաև  տեխնիկական  հագեցվածության  մասին՝ նախագահը  մասնավորապես  ասել  է, որ կառույցի աշխատակիցներն իրականացնում են կարևոր և պատասխանատու աշխատանք՝ յուրաքանչյուր վայրկյան պատրաստ արձագանքել տարբեր արտակարգ իրադարձությունների, օգնության հասնել քաղաքացիներին  և  լուծել  ծագած  խնդիրները: Դրանք  կատարելու  համար  պահանջվում է համապատասխան մասնագիտական պատրաստվածություն, հմտությունների և ունակությունների կատարելագործում, ոլորտին առնչվող նորարարությունների կիրառում, համակարգի կենտրոնական  և տարածքային կառույցների հետ սերտ կապի ապահովում, համակարգված փոխգործակցություն բոլոր շահագրգիռ գերատեսչությունների   հետ:

«Պետությունն ուշադրության կենտրոնում է պահում արտակարգ իրավիճակների պետական ծառայության գործունեությունը: Այս տարիների ընթացքում մեծածավալ աշխատանքներ են իրականացվել գերատեսչության նյութատեխնիկական բազայի արդիականացման, աշխատակիցների սոցիալական պայմանների բարելավման ուղղությամբ»,-մասնավորապես  ասել  է  նախագահը:

ԱՀ  ԱԻՊԾ   տնօրեն  գնդապետ  Կարեն  Սարգսյանը  ևս  շնորհավորել  է  ծառայության   աշխատակիցներին՝ ցանկանալով   հաջողություններ  ու  ձեռքբերումներ իրենց  պատասխանատու  գործում:

Կ.  Սարգսյանն  իր  ելույթում  ասել է, որ դեռևս 1991 թվականի մայիսի 24-ին կազմավորված «Արցախ» փրկարարական ջոկատը տարեցտարի զարգացման  նոր փուլերի միջով անցնելով,  կայացել ու կատարելագործվել է: 1995 թվականին ԱՀ կառավարության որոշմամբ ստեղծվել  է  արտակարգ իրավիճակների վարչությունը` որպես հանրապետական նշանակության պետական մարմին: Հետագայում վարչության ենթակայությանն է միացվել  Ստեփանակերտի, Ասկերանի, Հադրութի, Մարտակերտի, Մարտունու և Շուշիի ռազմականացված հրշեջ մասերը:

«ԱԻՊ  ծառայությունն իր մեջ ընդգրկում է փրկարարական և հրշեջ-փրկարարական ծառայությունները, քաղաքացիական պաշտպանությունը, տեխնիկական անվտանգության, սեյսմիկ պաշտպանության, հիդրոօդ ծառայության և պետական նյութական պահուստի բնագավառների գործառույթների իրականացումը: Ծառայության գործունեության առաջնահերթ խնդիրը եղել և մնում է բնակչության և տարածքների պաշտպանությունը: Նախորդ տարիների ընթացքում համապատասխան օրենսդրական ակտերի ընդունման արդյունքում կատարելագործվել է ծառայության իրավական դաշտը, չկարգավորված խնդիրներին տրվել է համապատասխան օրենսդրական լուծումներ, որոնք լինելու են շարունակական նաև առաջիկա տարիներին: Ծառայությունն ակտիվորեն համագործակցում է ինչպես հանրապետության տարբեր կառույցների և գերատեսչությունների հետ, այնպես էլ ՀՀ արտակարգ իրավիճակների նախարարության հետ` իրականացնելով փորձի փոխանակում, կադրային, մասնագիտական վերապատրաստում, տեխնիկական և նյութական աջակցություն և այլն»,- մասնավորապես  ասել  է  Կ.  Սարգսյանը:

Նրա  խոսքով՝ վերջին մեկ տարում իրականացված շինաշխատանքների շնորհիվ էապես բարելավվել են ծառայության շենքային պայմանները և բարեկարգվել հարակից տարածքները: Նմանատիպ աշխատանքներ իրականացվում են նաև շրջաններում, որոնք  ավարտին կհասցվեն նախատեսված ժամկետներում: Ընթացիկ տարում արդիականացվել և թարմացվել է ծառայության նյութատեխնիկական բազան և ավտոտեխնիկական պարկը, ձեռք են բերվել նոր ավտոմեքենաներ: Ծառայությունը համալրվել է տարբեր գրասենյակային տեխնիկայով, փրկարարական և հատուկ գույք-սարքավորումներով: Այդ ամենն իրականացվել է ինչպես պետբյուջեի, այնպես էլ մի շարք բարերարների նվիրատվությունների շնորհիվ:

Միջոցառմանը  ռուսաստանաբնակ գործարար և բարերար Նորայր Սարիբեկյանը ծառայությանը նվիրել է 4 «ՈՒԱԶ» և 1 «ՆԻՎԱ» մակնիշի ավտոմեքենաներ, որոնց   բանալիները  տրամադրվել  են ծառայության տարածքային ստորաբաժանումների  պատասխանատուներին:

Ծառայության  ընթացքում  ցուցաբերած   բարձր  առաջադիմության  համար  և  մասնագիտական տոնի  կապակցությամբ, ԱՀ  նախագահը «Երախտագիտություն»  մեդալով  պարգևատրել  է  Մարտունու, Ասկերանի, Հադրութի, Մարտակերտի, Շուշիի   շրջանային  արտակարգ  իրավիճակների  բաժինների հրշեջ-փրկարարական ծառայության  5  աշխատակիցների:  ԱՀ արտակարգ  իրավիճակների  ծառայությանը  ցուցաբերած  բարեգործական  աջակցության  համար  «Կապավոր» ՍՊ  ընկերության  խորհրդի  նախագահ  Արման Հակոբջանյանն  էլ  Բ.  Սահակյանի  կողմից  արժանացել  է   «Վաչագան Բարեպաշտ»   մեդալի:

Տոնի  առթիվ ԱՀ ԱԻՊԾ  տնօրեն  Կարեն  Սարգսյանը, ՀՀ  արտակարգ  իրավիճակների  նախարար  Ֆելիքս Ցոլակյանը, ԱՀ  ուժային  կառույցների  ղեկավարները  մեդալներով, դրամական  պարգևներով  և  թանկարժեք  նվերներով  պարգևատրել  են  ԱԻՊԾ  մի   խումբ  աշխատակիցների:

Դրամական  պարգևի  արժանացած  ԱԻՊԾ  ճգնաժամային  կառավարման  կենտրոնի  օպերատոր, առաջին  կարգի  հաշմանդամ   Կամո  Միրզոյանը  մեզ  հետ  զրույցում  ասել  է,  որ   ցանկացած պետական պարգև ստանալն  իրենց  համար  մեծ պատիվ   և  պատասխանատվություն  է:

Պարգևատրման  արարողությունից  հետո  Բակո  Սահակյանը, ներկաների  հետ   շրջել  և  ծանոթացել  են  կառույցի շենքային  պայմաններին  և  տեխնիկական    սարքավորումներին: