ՍՏԵՓԱՆԱԿԵՐՏ, հոկտեմբերի 31, ԱՐՑԱԽՊՐԵՍ: «Արցախպրես»-ի  թղթակցի  հաղորդմամբ՝  միջոցառմանը  բացման  խոսքով հանդես  է  եկել   «Մայրություն»  հասարակական  կազմակերպության  նախագահ Հասմիկ  Միքայելյանը:

Նա   իր  խոսքում  շնորհակալություն  է  հայտնել բոլոր  այն  անձանց, ովքեր  30  տարի  շարունակ   աջակցել   և  օգնել  են  կազմակերպության    ստեղծմանը, կայացմանն ու  զարգացմանը: Հ.  Միքայելյանն  ընդգծել  է, որ ՀԿ-ի յուրաքանչյուր  անդամ   պատրաստակամ է  իր  մասնակցությունը  բերելու հանրապետության կենսագործունեությանը  միտված  բոլոր  միջոցառումներին՝  ի  բարօրություն   Արցախի  ծաղկմանն  ու  բարգավաճմանը, և  ի  շահ    Արցախի  անկախության  վերջնական  հաղթանակի:

Կազմակերպության  30-ամյա  գործունեության  մասին հանգամանալից   ներկայացրել  է «Մայրություն»  ՀԿ  համանախագահ  Սիրվարդ  Մարգարյանը:   

Ըստ  Ս. Մարգարյանի՝  «Մայրություն»-ը ստեղծվել  է  ականավոր  բանաստեղծուհի, երջանկահիշատակ  Մարո  Մարգարյանի  նախաձեռնությամբ  1988 թվականի  մայիսի  25-ին Ստեփանակերտում,  որի  առաջին  նախագահն   է  ընտրվել  Հասմիկ  Միքայելյանը: 30  տարիների  ընթացքում կազմակերպության  նշանաբանն է  եղել  «Գթասրտություն  առանց  սահմանի»  կարգախոսը:

«Ազատագրական  շարժման  առաջին  իսկ  օրերից  կանանց  կազմակերպությունը  դարձել  է  քաղաքական շտաբ՝ ընդդեմ ազգային ինքնորոշման  իրավունքի ոտնահարման, մարդու, մոր  և  մանկան, ընտանիքի  իրավունքի   պաշտպանության  համար  ադրբեջանական  իշխանությունների  կամայականությունների:  Արցախյան ազգային-ազատագրական պայքարի  ծնունդ   կանանց  շարժումը  եղել  և մնում  է  որպես  հասարակական-քաղաքական ինքնուրույն  ուժ:  30-ամյա   պայքարի  ձևերը  տարբեր էին՝ քաղաքական հանրահավաքներ, ցույցեր, գործադուլներ, հացադուլներ, բողոքի  հեռագրեր  և  դիմումներ՝  ի  պաշտպանություն մարդու  իրավունքի՝ աշխարհի  բազմաթիվ  գործող  կազմակերպություններին:   Այս  տարիների  ընթացքում  մենք  աջակցություն   ենք    ցուցաբերել   ֆիդայական  ջոկատներին՝  սննդով, հագուստով ու  դեղամիջոցներով:  Իրականացրել    դոնորոկան  օգնություն  վիրավոր  ազատամարտիկներին,  խնամք  հոսպիտալներում, ացելել    զոհված  ազատամարտիկների ընտանիքներին, ամենամյա  նյութական  օգնություն երկկողմանի  ծնողազուրկ, զոհված  ազտամարտիկների, խուլ  ու  համր, անշարժ, հաշմանդամ  երեխաներին»,- մասնավորապես  ասել է   Ս.  Մարգարյանը:

Նա  նաև  ասել  է, որ  «Մայրություն»-ը  եղել   և  այսօր  էլ շարունակում է  լինել  զինվորի  կողքին, ամենօրյա  ուշադրության  կենտրոնում  պահելով  նրանց հոգսերն  ու  խնդիրները:

Ֆորումին  հրավիրված   Արցախի   հերոս Արկադի  Տեր-Թադևոսյանն  առաջիններից  է  եղել, ով  արժանացել  է «Մայրական երախտագիտություն»   մեդալի:

Իր   խոսքում   նա  ընդգծել է  այն  մեծ  ավանդը, որ  բերել  է    «Մայրություն»  կազմակերպությունը՝  սկսած  իր  ստեղծման  օրից  մինչ  այսօր:

«Մայրությունն այն  մեծ  արժեքն  է,  որը    յուրաքանչյուրիս  համար  սուրբ է:  Անուրանալի  է     այս  կազմակերպության   վաստակը  թե´  Արցախյան  շարժման,  և  թե´  խաղաղ   տարիներին: Տեսնելով   այս  կազմակերպության   կանանց կատարած աշխատանքը, մենք  ևս  ոգևորվեցինք»,-նշել  է  Ա.  Տեր-Թադևոսյանը:

Ցերեկույթին  շնորհավորական ելույթներով  հանդես  են  եկել   նաև     ԱՀ  Ազգային  ժողովի   արտաքին  կապերի  հանձնաժողովի  նախագահ,  կազմակերպության  համանախագահ  Արզիկ  Մխիթարյանը, աֆղանական  և  արցախյան պատերազմների  մասնակից Արմեն  Գևորգյանը   և  այլք: Ընթերցվել  է  նաև  ԱՀ պաշտպանության նախարար Լևոն Մնացականյանի  շնորհավորական  ուղերձը:

Հ. Միքայելյանը  «Մայրական երախտագիտություն»  մեդալով  պարգևատրել է  արցախյան  և  ապրիլյան ռազմագործողությունների մասնակից, զորամասի  հրամանատար, գնդապետ  Մարտին  Ջհանգիրյանին:

«Լավագույն սպայական  ընտանիք» մեդալներին      էլ արժանացել  են    Արցախի  հերոս  Յուրի  Պողոսյանի  և Ստեփանակերտի զինվորական  կոմիսար  Գրիգորի  Գասպարյանի  ընտանիքները:

Ելույթներն   ընդմիջվել  են   հայրենասիրական  երգերով, որոնք     ապահովել  են  ԱՀ  պաշտպանության  բանակի  «Ասպետ»  համույթը  և   անհատ-կատարող  Գոհար  Ալեքսանյանը:

Միջոցառմանը  «Մռակած»  պետական  երգչախմբի  կատարմամբ   հնչել  է «Քայլերթ» երգի պրիմիերան՝ նվիրված  Արցախի  հերոս  Արկադի  Տեր-Թադևոսյանին, որի խոսքերի  հեղինակն  է   Գառնիկ  Սարգսյանը, իսկ  երաժշտությանը՝  կոմպոզիոտոր   Սիմոն  Սարգսյանը:

Վերջում   ՀԿ  անդամները    ներկաներին  են  նվիրել  «Մայրս  պատկերն  է  մայր   հայրենիքիս»   գիրք-ալբոմը: 

Միջոցառմանը  ներկա  էին  ԱՀ  նախագահ  Բակո  Սահակյանը,  պետական  պաշտոնյաներ, «Մայրություն» ՀԿ  անդամներ, հյուրեր    և  այլք: