Ստեփանակերտի «Թումո» ստեղծարար տեխնոլոգիաների կենտրոնում ցուցադրվել է աշխատարանի ընթացքում նկարահանված «Լռություն փորձն սկսված է» կարճամետրաժ վավերագրական ֆիլմը:
«Թումո»-ի աշակերտներն Ստեփանակերտի պետական դրամատիկական թատրոնի մասին վավերագրական ֆիլմ են նկարահանել
ՍՏԵՓԱՆԱԿԵՐՏ, 2 նոյեմբերի, ԱՐՑԱԽՊՐԵՍ: 6:40 րոպե տևողությամբ վավերագրական ֆիլմը պատմում է Ստեփանակերտի Վահրամ Փափազյանի անվան պետական դրամատիկական թատրոնի մասին:
Միջոցառմանը բացման խոսքով հանդես է եկել Ստեփանակերտի «Թումո» ստեղծարար տեխնոլոգիաների կենտրոնի ղեկավար Հայկ Աբգարյանը:
Նրա խոսքով՝ թումոցիները վավերագրական ֆիլմերի ստեղծման աշխատարանի ղեկավար, ամերիկացի Մերի Քեթրինի հետ, նկարահանելով «Լռություն փորձն սկսված է» ֆիլմը, փորձել են ցույց տալ Ստեփանակերտի մայր թատրոնի ներկայիս անմխիթար վիճակը, որը հասարակության համար մեծ ցավ ու մտահոգություն է:
«Արցախպրես»-ի թղթակցի հետ զրույցում աշխատարանի ղեկավար ամերիկացի Մերի Քեթրինն ասել է, որ արցախցի երեխաների հետ աշխատել է շուրջ երկու շաբաթ:«Սկզբում ուսումնասիրել ենք դրամատիակական թատրոնի շենքային պայմանները, որից հետո սկսկել ենք իրականացնել նկարահանումները: Թատրոնի անձնակազմը հոգատար ու ջերմ վերաբերմունք է ցուցաբերել մեր նկատմամբ: Երեխաների հետ մենք կարողացել ենք հեշտ ու արագ աշխատել: Արցախցի երեխաները տաղանդավոր են և ունեն մեծ ներուժ: Նկարահանումների ժամանակ չնայած դժվար էր տեխնիկայի հետ աշխատելը, բայց երեխաների հմտությունների արդյունքում մենք կարողացանք կարճ ժամանակում ստեղծել ֆիլմ: Նկարահանումների ողջ ընթացքում ես ընկճվում էի, տեսնելով թատրոնի հին իրերը, շենքի պատերի ճաքերը, գրեթե քանդված շենքային պայմանները: Կարծում եմ՝ այս ֆիլմի դիտողները կկարողանան ինչ-որ ձևով օգտակար լինել մշակութային այս օջախի վերակառուցման գործին»,-ավելացրել է աշխատարանի ղեկավարը:
Ֆիլմի նկարահանումների մասնակից Լուսինե Միրզոյանի խոսքով՝Մ. Քեթրինն ամեն ինչ անում էր, որպեսզի աշխատարանի 12 մասնակիցները հաճույքով աշխատեն:
«Աշխատարանի ղեկավարը բացատրում էի ֆիլմ նկարահանելու նրբությունները, ուշադրություն էր դարձնում ցանկացած մանրուքի, որոնք օգնեցին մեզ՝ ստեղծելու այս վավերագրական ֆիլմը: Նկարահանումների ժամանակ հարցազրույցներ ենք վերցրել թատրոնի աշխատակիցներից, դերասաններից ու ռեժիսորից: Ցավալի է, որ հազարամյակների պատմություն ունեցող հայոց թատրոնը որևէ տեղ նման պայմաններում է աշխատում»,-նշել է Լ. Միրզոյանը:
