ՍՏԵՓԱՆԱԿԵՐՏ, 3 նոյեմբերի, ԱՐՑԱԽՊՐԵՍ: Համերգային  ծրագրի  ընթացքում  հնչել  են  ՀՀ  արվեստի  վաստակավոր  գործիչ, Իսրայելի  կոմպոզիտորների  միության  անդամ մաեստրո Վիլլի Վայների  երգչախմբային  ստեղծագործությունների  նոր   ծրագրի    կատարումները,   ինչպես  նաև կատարվել  են  կոմիտասյան խմբերգեր:

ՀՀ  վաստակավոր  գործիչ  Հարություն  Թոփիկյանի ղեկավարած  Երևանի   պետական  կամերային  երգչախումբը ներկայացրել  է «Willy Weiner and Friends»   ծրագիրը, որը  ներառում  է  մաեստրոյի 14  ստեղծագործությունները, որոնց  երգչախմբային  փոխադրումները կատարել  են    կոմպոզիտորի հայտնի  հայ  երաժիշտներ  Մարտին  Վարդազարյանը, Երվանդ  Երկանյանը, Աննա  Ազիազյանը, Հովհաննես Համբարձումյանը  և  այլք:

Համերգային երեկոյին  տեղի  է  ունեցել  նաև  «Willy Weiner and Friends»     ձայնասկավառակի  շնորհանդեսը: Համերգային  ծրագրի   հեղինակն  ու գեղարվեստական  ղեկավարը  եղել է  Հայաստանի  «Մենորա» հրեական մշակութային  կենտրոնի փոխնախագահ Արմեն Արնաուտովը:

 «Արցախպրես»-ի  թղթակցի  հետ զրույցում  Երևանի  պետական  կամերային  երգչախմբի  գեղարվեստական    ղեկավար  և  խմբավար  Հարություն  Թոփիկյանն  ասել է, որ  ընթացիկ տարվա  փետրվարին Երևանում   կայացել  է  «Willy Weiner and Friends»  ծրագրի պրեմիերան, իսկ   ձայնասկավառակինը  ցանկացել  են  ներկայացնել  Արցախում: 

Նրա   խոսքով՝   Արցախ  գալը  և  արցախցիների  համար   համերգային  ծրագիր  կազմակերպելը  մեծ   պատիվ  է  թե՛  իր, թե՛ Վիլի  Վայների  և  թե՛    երգչախմբի  անդամների  համար:

Խոսելով  Երևանի  պետական  կամերային  երգչախմբի  մասին՝  Հ. Թոփիկյանը  նաև  ասել է, որ այն  ստեղծվել  է  22  տարի   առաջ:

«Հայաստանյան համերգներից բացի երգչախումբը հյուրախաղերով հանդես է եկել   նաև Եվրոպայի, ԱՄՆ-ի, Մերձավոր Արևելքի և Հարավային Կովկասի երկրներում: Երգչախմբի  համերգային    ծրագիրը  բազմաժանր  է  ներառյալ կոմիտասյան, ջազային, դասականների երաժշտությունները: Առաջիկայում  պատրաստվում ենք  համերգային  ծրագրով  հանդես  գալ  Կոմիտասի 150-ամյակին   նվիրված   համերգին, որի   ընթացքում   պետք  է  երգչախումբն  ամբողջացնի  և  բեմ  հանի արդեն  իսկ  հնչեցված  147  խմբերգերը»,-ավելացրել  է  երգչախմբի   գեղարվեստական   ղեկավարը:

Իսկ  Վիլլի Վայները, խոսելով «Willy Weiner and Friends»  ծրագրի  մասին՝ ասել է, որ այն  ոճայնության  առումով երաժշտության  ասպարեզում  նորություն  է:

«Առաջին  անգամ  գործիքային  երաժշտությանը  վոկալ  կատարմամբ  ներկայացնելու  գաղափարը իրականացրել  է  «The Swingle  Singers»  խմբի  հիմնադիր Ուորդ Սվինգլը, ինչը  նախորդ  դարի  60-ական  թվականներին  դարձել է հեղափոխական, վառ  ու յուրահատուկ   երևույթ: Մենք  առաջիններից   ենք, որ  Հայաստանում այսպիսի   ծրագիր  ենք իրականացրել:Ծրագրում ընդգրկված  են  ժամանակին հնչեցված  դաշնամուրային   և    նվագախմբային  երգեր: Իմ  անմիջական  մասնակցության  ընթացքում ստեղծվել  են երգչախմբային պարտիտուրաներ, որոնք  ընդգրկվել  են «Charal pieces by  Willi  Weiner»  նոտաների ժողովածուում: Իմ  յուրաքանչյուր   ծրագիր  ես  սկսում   եմ  Արցախից: Ինձ  համար  Արցախը  սրբավայր  է, քանի  որ    իմ   հայրը   կանգնած  է եղել  արցախյան  շարժման  ակունքներում:  Այս  երկրի  հանդեպ  իմ  սերը   փոխանցվել է հորիցս: Արցախը սիրտն  է, որ   բաբախում  է  հայության համար»,-մասնավորապես  ասել  է Վ.  Վայները:

ԱՀ  մշակույթի, երիտասարդության  հարցերի  և զբոսաշրջության   նախարար  Լեռնիկ  Հովհաննիսյանը բարձր է  գնահատել  կամերային  նվագախմբի համար  նախատեսած  ստեղծագործությունների  վերածումը    երգչախմբային  կատարման, որն  էլ  առաջին  անգամ  ներկայացվել  է  հենց արցախցի  հանդիսատեսին:

Միջոցառմանը  ներկա  ԱՀ  կրթության, գիտության  և սպորտի  նախարար  Նարինե  Աղաբալյանը  ևս շնորհակալություն  է հայտնել     համերգային  ծրագրի   մասնակիցներին՝ հույս  հայտնելով,  որ   իրենց համագործակցությունը   լինելու  է   շարունակական:

Համերգային   ծրագրի  վերջում     հանդիսատեսներին  է  բաժանվել  «Willy Weiner and Friends»  անվամբ ձայնասկավառակները:

Միջոցառմանը  ներկա  էին  նաև  ԱՀ  Ազգային  ժողովի  նախագահ  Աշոտ  Ղուլյանը, ԱՀ  ԱԺ պատգամավորներ, պետական  պաշտոնյաներ, արվեստասեր  հասարակության  ներկայացուցիչներ  և  այլք: