Արցախի պարի պետական համույթի նախաձեռնությամբ և ԱՀ մշակույթի, երիտասարդության հարցերի և զբոսաշրջության նախարարության աջակցությամբ Արցախի պարարվեստի քոլեջի սաները հեռուստակամուրջի միջոցով կապ են հաստատել Արգենտինայի Վիսենտե Լոպեսի հայկական դպրոցի աշակերտների հետ:
Կազմակերպվել է հեռուստակամուրջ՝ Արցախի պարարվեստի քոլեջի և Վիսենտե Լոպեսի հայկական դպրոցի աշակերտների միջև
ՍՏԵՓԱՆԱԿԵՐՏ, 21 նոյեմբերի, ԱՐՑԱԽՊՐԵՍ: Հաղորդակցման ընթացքում Սփյուռքում ապրող հայ և օտարազգի աշակերտները շփվել են արցախցի իրենց հասակակիցների հետ և փոխադարձ հարցեր ուղղել միմյանց:
«Արցախպրես»-ի թղթակցի հետ զրույցում ԱՀ մշակույթի, երիտասարդության հարցերի և զբոսաշրջության նախարարության ներկայացուցիչ Աշոտ Սարկիսյանն ասել է, որ Արցախի պարի պետական համույթը կազմակերպչական աշխատանքներ է իրականացնում, որ 2019 թվականին հյուրախաղերով հանդես գա մի շարք երկրներում, այդ թվում նաև Արգենտինայում:
«Կազմակերպչական աշխատանքների ընթացքում Արցախի պարի պետական համույթի ադմինիստրատոր Միքայել Հայրապետյանն այս տարվա մայիսին, երբ այցելել էր Վիսենտե Լոպեսի հայկական դպրոց, այնտեղ իրեն առաջարկել են, որ ցանկություն ունեն Արցախի դպրոցականների միջև հեռուստակամուրջ կազմակերպել. այն այսօր իրականություն է դարձել: Մեր նպատակն է, որ Վիսենտե Լոպեսի հայկական դպրոցի և Արցախի պարարվեստի քոլեջի, պարի համույթի երեխաները փոխադարձ շփում ունենան, ծանոթանան ինչպես Արցախի առօրյայի այնպես էլ Սփյուռքում հայապահպանության դերի մասին»,-ավելացրել է Ա. Սարկիսյանը:
Արցախի պարարվեստի քոլեջի տնօրեն Ստելլա Զաքարյանն էլ ասել է, որ հաստատված առաջին հեռուստակամուրջը համագործակցության սկիզբ կհանդիսանա Արցախում և Արգենտինայում ապրող աշակերտների համար:
«Կարևոր է, որ Սփյուքռում ապրող մեր հայրենակիցները պատկերացում կազմեն իրենց պատմական հայրենիքի մասին: Նման միջոցառումների արդյունքում հնարավոր են նաև փոխայցելությունների կազմակերպումը:Այս շփումների արդյունքում գուցե և որևէ հայի մոտ ցանկություն կառաջանա բնակություն հաստատել հայրենիքում՝ Արցախում կամ Հայաստանում: Առանձնահատուկ կարևորում եմ այն փաստը, որ մեր հայրենակիցներն օտար ափերում կարողանում են պահպանել իրենց ինքնությունը՝ կառուցելով եկեղեցի ու դպրոց»,- նշել է Ս. Զաքարյանը:
Ողջունելով նման նախաձեռնությունները՝ Արգենտինայի Վիսենտե Լոպեսի դպրոցի հայերենի բաժնի տնօրեն Կարինե Հարությունյանն ասել է, որ իրենք շատ ուրախ են, որ կարողանում են անկեղծ և անմիջական զրույց ունենալ աշխարհի երկու տարբեր ծայրերում ապրող հայերը:
Խոսելով Վիսենտե Լոպեսում հայապահպանության դերի մասին, Կ. Հարությունյանը տեղեկացրել է.
«Ցեղասպանությունից մազապուրծ եղած շատ հայեր հասել են մինչև Արգենտինա: Հաղթահարելով մղձավանջը՝ աշխարհով մեկ սփռված հայերը կարողացել են իրենց մեջ ուժ գտնել օտար ափերում՝ կազմելով հայկական ավանդույթներով ընտանիք, հայեցի կրթություն ու դաստիարակաություն տալով իրենց զավակներին: Այս տրամաբանությամբ տեղի հայերը 1966 թվականին Վիսենտե Լոպեսում կառուցվել է հայապահպանության մեջ մեծ նշանակություն ունեցող հայկական դպրոց, իսկ 1968 թվականին էլ՝ Սուրբ Գևորգ եկեղեցի: Ունենք նաև մանկապարտեզ, տարրական դպրոց, կրթական վարժարան: Այսօր դպրոցը հայապահպանության սուրբ գործին զուգահեռ իրականացնում է նաև հայոց լեզվի, մշակույթի և պատմության տարածման առաքելություն:Ի դեպ, հայկական դպրոց հաճախող երեխաները շաբաթական մեկ անգամ որևէ ռեստորանում կազմակերպում են հայկական ուտեստների տոն և այդ օրվա հավաքագրած ողջ գումարները տրամադրում կրթօջախի շրջանավարտներին՝ Հայաստանում ճամփորդություն իրականացնելու համար: Տեղի հայության ջանքերով 2015 թվականին հրապարակում տեղադրվել է խաչքար, որտեղ ամեն տարի ապրիլի 24-ին Ցեղասպանության անմեղ զոհերի հիշատակին նվիրված կազմակերպվում են միջոցառումներ: Կարևորելով հայերի դերն Արգենտինայի զարգացման գործում՝ 2018 թվականին Վիսենտե Լոպեսի քաղաքապետարանը Սուրբ Գևորգ եկեղեցու 50-ամյակի առթիվ հրապարակը անվանել է «Արմենիա»»:
Նրա խոսքով՝ դպրոցում դասավանդվող առարկաների շարքում իրենց տեղն ունեն հայոց լեզու, հայ գրականություն, հայոց պատմություն, հայկական մշակույթ (երգ ու պար, թատրոն) առարկաները: Վերոնշյալ առարկաները սովորում են ոչ միայն ազգությամբ հայ այլև` օտարազգի աշակերտներ:
Միջոցառմանն Արցախի պարարվեստի քոլեջի աշակերտները հանդես են եկել ազգագրական պարերով
Վիսենտե Լոպեսի դպրոցի և Արցախի պարարվեստի քոլեջի աշակերտները հաջողություն են մաղթել միմյանց՝ նորից տեսնելու ցանկությամբ:
