Սոցիալական պաշտպանության ոլորտի ծախսերը 2019 թվականի պետական բյուջեի նախագծում նախատեսված են 23 մլրդ 387.6 մլն դրամ, կամ ընթացիկ տարվա համար պլանավորված ցուցանիշից ավել 480.9 մլն դրամով, որը փաստացի բյուջեի ծախսային կառուցվածքում ամենամեծ մասնաբաժին ունեցող ոլորտն է` ընդհանուր ծախսերի մոտ 21.7%-ը:
Արցախում գալիք տարում կներդրվի կուտակային կենսաթոշակային համակարգ. ֆինանսների նախարար
ՍՏԵՓԱՆԱԿԵՐՏ, 22 նոյեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այս մասին այսօր՝ նոյեմբերի 22-ին, «ԱՀ 2019թ. պետական բյուջեի մասին» ԱՀ օրենքի նախագծի քննարկմանն ասել է ֆինանսների նախարար Արթուր Հարությունյանը՝ մանրամասնելով, որ սոցիալական պաշտպանության ոլորտի ծախսերի ավելացումը հիմնականում պայմանավորված է 2019 թվականի հուլիսի 1-ից ԱՀ-ում կուտակային կենսաթոշակային համակարգի ներդրման արդյունքում պետության կողմից վճարվելիք կուտակային հատկացումների նախատեսմամբ: Այն, ըստ նախարարի, հնարավորություն է ստեղծելու հանրապետությունում աշխատանքային գործունեության ընթացքում կուտակային սոցիալական վճար կատարած անձանց կենսաթոշակային տարիքում պետական կենսաթոշակից բացի կուտակված լրացուցիչ եկամուտ ստանալու՝ ապահովելով կատարված կենսաթոշակային վճարների և ստացվող կենսաթոշակի չափի միջև ուղղակի կապը:
