«Մտքի, խղճի, դավանանքի ազատության և կրոնական կազմակերպությունների մասին» օրենքի նախագծի շուրջ ԱԺ-ում իրականացվել են խորհրդարանական լսումներ
Արցախի Հանրապետության Ազգային ժողովում կազմակերպված խորհրդարանական լսումներին քննարկվել է ԱԺ «Շարժում 88» խմբակցության անդամ Գագիկ Բաղունցի հեղինակությամբ ներկայացված «Մտքի, խղճի, դավանանքի ազատության և կրոնական կազմակերպությունների մասին», «ԱՀ վարչական իրավախախտումների վերաբերյալ ԱՀ օրենսգրքում փոփոխություններ և լրացումներ կատարելու մասին» և «ԱՀ քրեական օրենսգրքում փոփոխություններ և լրացումներ կատարելու մասին» ԱՀ օրենքների նախագծերի փաթեթը:
«Մտքի, խղճի, դավանանքի ազատության և կրոնական կազմակերպությունների մասին» օրենքի նախագծի շուրջ ԱԺ-ում իրականացվել են խորհրդարանական լսումներ
ՍՏԵՓԱՆԱԿԵՐՏ, 17 դեկտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ ներկայացնելով նոր օրենքի նախագիծը Գագիկ Բաղունցն ասել է, որ օրենքի նախագծի 8 գլուխների 26 հոդվածներում ներկայացված են կրոնական կազմակերպության սահմանման մեջ անհրաժեշտ հստակեցումները, կրոնական կազմակերպություններին ներկայացվող պահանջները, փորձագիտական եզրակացության հետ կապված խնդիրների կարգավորումը, կրոնական կազմակերպությունների պարտականությունները, արգելքներ կրոնական կազմակերպության գործունեության և իրավական հետևանքների համար համարժեք տույժերի նշանակումը: Օրենքի նախագծում ներկայացված է կրոնական կազմակերպության լուծարման դեպքերն ու կարգը:
«Օրենքի նախագծի ուսումնասիրության արդյունքում ԱՀ արդարադատության նախարարության կողմից ներկայացվել են 22, ԱՀ մարդու իրավաունքների պաշտպանի կողմից 10 և ոստիկանության պետի կողմից 7 առաջարկություններ: Առաջարկությունների էական մասն ընդունված է, համապատասխան փոփոխությունները և ճշտումները մտցված են նախագծի նոր տարբերակում: Օրենքի ընդունման անհրաժեշտությունը պայմանավորված է այն հանգամանքով, որ գործող «Խղճի ազատության և կրոնական կազմակերպությունների մասին» ԱՀ օրենքով սահմանված չէ պետականորեն չգրանցված կրոնական միավորումների կարգավիճակը, իրավունքները և պարտականությունները, սահմանված չէ փորձագիտական եզրակացության կայացման կարգը, անհրաժեշտ փաստաթղթերի ցանկը և դրանց ներկայացման կարգը: « Վարչական իրավախախտումների վերաբերյալ» և «ԼՂՀ քրեական օրենսգրքում» բացակայում են «Խղճի ազատության և կրոնական կազմակերպությունների մասին» օրենքով սահմանված իրավախախտումների վերաբերյալ տույժերը: ԱՀ-ում գործող բոլոր կրոնական միավորումների նկատմամբ օրենքի կիրարկումն կապահովի անօրինական գործողությունների կանխում՝ համապատասխան բացատրական աշխատանքների, իրազեկման և տույժի միջոցների կիրառմամբ»,-մանրամասնել է Գ. Բաղունցը:
Ըստ նախագծի հեղինակի՝ ԱՀ-ում գործող չգրանցված կրոնական խմբերը շարունակում են հավաքներ կազմակերպել, զբաղվել հոգևոր քարոզչությամբ, տարածել բազմաթիվ քանակությամբ հոգևոր գրականություն՝ գրքերի, բրոշյուրների, տեսահոլովակների, խտասկավառակների տեսքով: Խախտելով ԱՀ օրենսդրությունը՝ չգրանցված կրոնական խմբերը սպառնում են ԱՀ պետական և հասարակական անվտանգությանը, կարգուկանոնին, քաղաքացիների առողջությանն ու բարոյականությանը, հասարակության մյուս անդամների իրավունքներին և ազատություններին: Հաշվի առնելով դրանք՝ խնդիր է առաջացել չգրանցված կրոնական խմբերին տալ կարգավիճակ, սահմանել նրանց իրավունքներն ու պարտականությունները և իրականացնել անհրաժեշտ վերահսկողություն համապատասխան մարմինների կողմից:
ԱԺ պետական-իրավական մշտական հանձնաժողովի նախագահ Հովիկ Ջիվանյանն ասել է, որ ԱՀ վարչական օրենսգիրքը այժմ մշակման փուլում է:
«Մենք չենք կարող նման օրենքներ քննարկել, մինչդեռ չունենք վարչական օրենսգիրք: Երբ որ կընդունենք վարչական օրենսգիրք, այդ ժամանակ օրենքը կքննարկենք: Գտնում եմ, որ ներկայումս այս օրենքի նախագծի անհրաժեշտությունը չկա, քանի որ ըստ գործող Սահմանադրության 41-րդ հոդվածի յուրաքանչյուր ոք ունի մտքի, խղճի ու դավանանքի ազատության իրավունք»,-մասնավորապես ասել է Հ. Ջիվանյանը:
Իսկ ԱՀ արդարադատության նախարար Արարատ Դանիելյանի խոսքով՝ ներկայացված օրենքի նախագիծը պետք է համահունչ լինի Սահմանադրության պահանջներին: Սահմանադրության 41-րդ հոդվածում հստակ նշվում է, թե ինչ իրավիճակներում պետք է վերոնշյալ իրավունքը սահմանփակվի:
ԱՀ մշակույթի, երիտասարդության հարցերի և զբոսաշրջության նախարար Լեռնիկ Հովհաննիսյանն էլ առաջարկել է օրենքի լրամշակված տարբերակը ներկայացնել համապատասխան շահագրգիռ կողմերին, վարչական օրենսգրքի հետ կապված խնդիրների կարգավորումից հետո օրենքը կրկին դնել քննարկման, քանի որ օրենքի անհրաժեշտությունը կա:
ԱՀ մշակույթի, երիտասարդության հարցերի և զբոսաշրջության նախարարության աշխատակազմի ազգային փոքրամասնությունների և կրոնի հարցերի բաժնի պետ Աշոտ Սարգսյանն էլ ասել է, որ 1997 թվականին, երբ որ ընդունվել է նախկին օրենքը, այն ժամանակ ԱՀ-ն չուներ Սահմանադրություն: Նախկին օրենքում բացակայում է չգրանցված կրոնական կազմակերպությունների մասը:
«Արցախում գործում են մի շարք չգրանցված կրոնական կազմակերպություններ, որոնք կարգավիճակ չունեն, չգիտեն իրենց իրավունքներն ու պարտականությունները: Այս օրենքում հստակ ներկայացնում ենք իրենց անելիքներն ու պարտականությունները: Այդ կրոնական կազմակերպությունները գրանցվելու իրավունք ունեն, եթե առաջնորդվեն ԱՀ օրենսդրությամբ: Իսկ օրենքով իրենք իրավունք չունեն ուրիշների վրա հոգեբանական ազդեցության մեթոդներ օգտագործել, կամ դռներ ծեծել և պարտադրել իրենց տված գրականությունն ընթերցել»,-նշել է Ա. Սարգսյանը:
ԱՀ Ազգային ժողովի նախագահ Աշոտ Ղուլյանն էլ ասել է, որ 2006 և 2017 թվականներին ընդունված ԱՀ Սահմանադրության մեջ նշված է Հայ առաքելական եկեղեցու առանձնահատուկ դերի մասին:
«ԱՀ Սահմանադրության 41-րդ հոդվածով սահմանվում է յուրաքանչյուր մարդու մտքի, խղճի և դավանանքի ազատության իրավունքը: Մտքի, խղճի և դավանանքի ազատության արտահայտումը կարող է սահմանափակվել միայն օրենքով, պետական անվտանգության, հասարակական կարգի, առողջության և բարոյականության կամ այլոց հիմնարար իրավունքների և ազատությունների պաշտպանության նպատակով: Կրոնական կազմակերպության և ստեղծման կարգը սահմանվում է օրենքով: Հենց այստեղ պետք է փնտրել մեր հարցերի պատասխանները: Օրենքի ընդունումն այս պահին պետք է քննարկել միայն Սահմանադրության համապատասխանեցման շրջանակներում: Քանի որ մենք նորություն չենք մտցնում ներկայացված օրենքի նախագծում, կարծում եմ, որ հիմք պետք է ընդունվի նախորդ օրենքը, բայց մի քանի տարբերությամբ: Ցանկացած օրենք կատարելագործման կարիք ունի և այդ նորությունները պետք է քննարկենք հանրային շահագրգիռ կողմերի հետ և հաշվի առնենք բոլորի կարծիքները»,-ավելացրել է Ա. Ղուլյանը:
Խորհրդարանի նախագահը օրենքի նախագծի հեղինակին առաջարկել է, որ այն ներկայացնի նաև սահմանադրական բարեփոխումների մասնագիտական խորհրդին, որից հետո կրկին կանդրադառնան օրենքին և հաշվի կառնեն այսօրվա նիստի բոլոր առաջարկությունները:
Նիստին իրենց առաջարկներով, պարզաբանումներով և մտահագություններով հանդես են եկել նաև ԱՀ մարդու իրավունքների պաշտպան Արտակ Բեգլարյանը, Նախագահի աշխատակազմի Կառավարության գործերի կառավարչության պետ Արայիկ Լազարյանը, Աժ պատգամավորներ, Հայ առաքելական եկեղեցու և կրոնական կազմակերպությունների ներկայացուցիչներ: