ԱՀ գյուղատնտեսության նախարարության և «Քարդ ագրոսերվիս» փակ բաժնետիրական ընկերության համատեղ նախաձեռնությամբ դեկտեմբերի 19-ից Ստեփանակերտում Արցախի հողօգտագործողների համար սկսվել են եռօրյա դասընթացներ:
ԱՀ գյուղնախարարությունում հողօգտագործողների համար կազմակերպվել են հերթական դասընթացները
ՍՏԵՓԱՆԱԿԵՐՏ, 20 դեկտեմբերի, ԱՐՑԱԽՊՐԵՍ: «Արցախպրես»-ի թղթակցի հետ զրույցում «Քարդ ագրոսերվիս» ՓԲ ընկերության ներկայացուցիչ Հակոբ Պողոսյանն ասել է, որ դասընթացների թեմաներն են ջերմատնային մշակության, խաղողագործության և Արցախում պտղաբուծության միջազգային փորձի տեղայնացումը:
Ըստ Հ. Պողոսյանի՝ դասընթացի առաջին օրն իրենք ներկայացրել են ջերմոցային կոստրուկցիաների, ջերմոցների զարգացման համար նոր տեխնոլոգիաների և բանջարանոցային տնտեսության վերաբերող հարցեր:
«Այսօր հողօգտագործողներին ենք ներկայացնելու խաղողի վազի էտի ու ձևավորման, խնամքի, ոռոգման, պտղաբուծության վերաբերյալ մի շարք հարցեր, ինչպես նաև խոսելու ենք վնասատուների դեմ քիմիական պայքարի միջոցների մասին»,-նշել է Հ. Պողոսյանը և հավելել, որ դասընթացի ժամանակ հողօգտագործողների կողմից բարձրացված հարցերից երևում է, որ ներկաները փորձում են ավելի շատ ինֆորմացիա ունենալ բարձր բերքատվության ստանալու համար:
Հ. Պողոսյանն ասել է նաև, որ բերքատվության առումով այսօր Արցախը դեռևս զիջում է աշխարհի առաջատար երկրներին: Պատճառը մասնագիտական գիտելիքների պակասն է և մշակության նոր տեխնոլոգիաներին չտիրապետելը:
Իսկ ԱՀ գյուղատնտեսության փոխնախարար Վիլեն Ավետիսյանն էլ ասել է, որ գյուղնախարարության կողմից հողօգտագործողների համար 2018 թվականի ընթացքում կազմակերպվել են մի շարք դասընթացներ: Դրանք վարել են Արցախի, Հայաստանի և արտերկրից հրավիրված առաջատար մասնագետները:
Ոլորտի պատասխանատուի հավաստմամբ՝ «Քարդ ագրոսերվիս» ՓԲ ընկերության հետ երկար տարիների համագործակցության փորձ ունի ԱՀ գյուղնախարարությունը: Այդ ընկերության ներկայացուցիչները գյուղատնտեսության բնագավառում մեծ փորձ ունեն:
«Եռօրյա դասընթացների ընթացքում հողօգտագործողները՝ ստանալով նոր գիտելիքներ և տեղեկանալով միջազգային փորձին, նրանք այն կօգտագործեն իրենց պրակտիկ աշխատանքներում: Շնորհիվ գրագետ ու գործունյա հողօգտագործողների՝ արդյունքում կունենաք էլ ավելի զարգացած գյուղատնտեսություն»,-նշել է Վ. Ավետիսյանը և հավելել, որ դասընթացներից երևում է, որ հողօգտագործողները բավականին տեղեկացված են, և ունեն մտահոգություններ, որ իրենց կատարած աշխատանքներից ավելի շատ եկամուտներ ստանան:
