ՍՏԵՓԱՆԱԿԵՐՏ, 11 հունվարի, ԱՐՑԱԽՊՐԵՍ:  «Արցախպրես»-ի թղթակցի հաղորդմամբ՝ այս մասին այսօր՝ հունվարի 11-ին տեղի ունեցած մամուլի ասուլիսի ժամանակ ասել  է ԱՀ  առողջապահության նախարար Արայիկ  Բաղրյանը՝  նշելով, որ  ներկա դրությամբ Արցախում  գործում են 143 լիցենզավորումներ  ստացած սուբյեկտներ, որոնցից 74-ը՝ բժշկական օգնության և սպասարկման, 44-ը՝ ստոմատոլոգիական,   66-ը՝ դեղատնային գործունեության  և 3-ը՝   թմրամիջոցների և հոգեմետ նյութերի ներմուծման  և մեծածախ առևտրի։

«Վերջին շրջանում մեր նախարարության կողմից մշտադիտարկում է իրականացվել հանրապետության լիցենզավորված ստոմատոլոգիական գործունեություն  իրականացնող կլինիկաներում  և  կաբինետներում։  Ի հայտ եկած թերությունները քննարկվել են նախարարությունում և տրվել համապատասխան ցուցումներ՝ սեղմ ժամկետներում դրանք վերացնելու համար։Արձանագրված թերություններից ուշագրավը սանիտարական ռեժիմի և լիցենզավորման պահանջների պայմանների խախտումներն են, ինչպես նաև  գործունեություն իրականացնող մասնագետների վերապատրսատում  չանցնելը»,-ընդգծել է   Ա.  Բաղրյանը՝   հավելելով, որ  ըստ պայմանավորվածության՝ ընթացիկ տարում  նախատեսվում է Երևանի Մխիթար Հերացու անվան պետական բժշկական համալսարանի աջակցությամբ կազմակերպել արտագնա վերապատրաստման դասընթացներ հանրապետությունում  գործող լիցենզավորված ստոմատոլոգիական կաբինետների մասնագետների համար։

Ա.  Բաղրյանը   տեղեկացրել  է  նաև, որ  2018 թվականին առողջապահության նախարարությունն իր գործունեությունն  իրականացրել  է  19 բուժհիմնարկների միջոցով, այդ  թվում՝  13 փակ բաժնետիրական ընկերությունների և  6 պետական ոչ առևտրային կազմակերպությունների, որոնցից 7-ը շրջանային բուժմիավորումներ են:

Ոլորտի   պատասխանատուն նաև   նշել  է, որ  ԱՀ   առողջապահության  նախարարության  ենթակայության տակ գործում են նաև թվով 5 տեղամասային հիվանդանոցներ, 20 գյուղական բժշկական ամբուլատորիաներ և 205 բուժակ-մանկաբարձական կետեր: Բուժհիմնարկներն  ունեն    707 մահճակալային ֆոնդ։