Արցախցի երիտասարդ տնտեսագետ Արտակ Հակոբյանը «Միջազգային բիզնես կառավարում» ծրագրի շրջանակներում 2017 թվականի սեպտեմբերին ընդունվել և վերջերս էլ ավարտել է Կիպրոսի Հանրապետությունում տեղակայված Բրիտանական միջազգային համալսարանը:
Պատրաստ եմ արտերկրում ստացած գիտելիքներս ներդնել ԱՀ տնտեսության զարգացման գործում. արցախցի տնտեսագետ
ՍՏԵՓԱՆԱԿԵՐՏ, 14 հունվարի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է Ա. Հակոբյանը:
Մեր զրուցակիցը պատմել է, թե ինչպես է որոշել մասնակցել «Միջազգային բիզնես կառավարում» ծրագրին և ընդունվել համալսարան:
«Ավարտել եմ Արցախի պետական համալսարանի տնտեսագիտության ֆակուլտետի մագիստրատուրայի բաժինը: Մեծ սեր ունենալով օտար լեզուների ուսումնասիրության հանդեպ՝ մասնակցեցի անգլերենի դասընթացների. այն ավելի խորացնելու նպատակով որոշեցի միառժամանակ ապրել անգլախոս միջավայրում: Իմ ցանկությամբ մասնակցել եմ «Միջազգային բիզնես կառավարում» ծրագրին: Ինձ հաջողվեց քննությամբ անցնել ընդունելության շեմը, և Կիպրոսում ընդունվել Բրիտանական համալսարան: 2017 թվականի սեպտեմբերից մեկ տարի սովորեցի այդ համալսարանում: Ավարտելուց հետո 3 ամիս աշխատեցի իմ ավարտական աշխատանքի վրա: Ուսման ժամանակ մենք ուսումնասիրել ենք միջազգային տնտեսագիտություն, բիզնես կառավարում, մարթքեթինգ, որոնք շատ արդի և պահանջված մասնագիտություններ են ամբողջ աշխարհում: 190 տարվա պատմություն ունեցող այդ բուհում, որպես արցախցի ուսանող ես առաջինն եմ եղել»,-մանրամասնել է Ա. Հակոբյանը՝ նշելով, որ ուսման ժամանակահատվածում ինքն այցելել է մի շարք արտադրական ընկերություններ, այդ թվում՝ գինեգործական, հացաբուլկեղենի, որոնց արտադրանքը մեծ հռչակ ունեն եվրոպական մի շարք երկրներում: Դասախոսում էին տարբեր երկրների աշխարհահռչակ տնտեսագետներ, բիզնես ծրագրերի ղեկավարներ:
Արտակը Բուլղարյայում ևս մասնակցել է սեմինարների, որտեղ էլ ծանոթացել է թե ինչպես է ոլորտի մասնագետներին հաջողվում մարդկային ռեսուրսների ճիշտ կառավարման արդյունքում լուրջ հաջողություններ գրանցել:
Արտակի խոսքով՝ ուսանելու տարիներին ինքը ջանք ու եռանդ չի խնայել Արցախը ներկայացնել այն օտարներին, ովքեր չեն եղել Արցախում, և առաջարկել գալ Արցախ և անձամբ ծանոթանալ մարդկանց և երկրում տիրող իրավիճակին:
Դասընթացների վերջում «Միջազգային բիզնես կառավարում» ծրագրի տնօրենն Արտակ Հակոբյանին ներկայացրել է որպես Բրիտանական միջազգային համալսարանի տարվա լավագույն ուսանողներից մեկը:
«Այս տարի նախատեսում եմ մասնակցել Գերմանիայում և Ավստրիայում կազմակերպվելիք ամենամյա բիզնես ծրագրերի վերաբերյալ թրեյնինգների, որին հրավիրված են լինելու աշխարհահռչակ բիզնեսմեններ: Նրանք ներկայցնելու են այն ուղիները, որոնց օգնությամբ նրանք բիզնես աշխարհում լուրջ հաջողությունների են հասել»,-ավելացրել է Արտակը:
Նա ընգծել է, որ Արցախում յուրաքանչյուր բիզնես ծառայության որակի բարելավումը կբերի լուրջ հաջողությունների: Խորհուրդ է տվել ԱՀ-ում բիզնեսով զբաղվող ընկերությունների համապատասխան ծառայությունների աշխատակիցների համար կազմակերպել դասընթացներ, որը խթան կհանդիսանա բարձր հիմքերի վրա դնել բիզնես ոլորտը:
Ա. Հակոբյանն ասել է, որ առաջարկ լինելու դեպքում, ինքը պատրաստ է իր ստացած գիտելիքները ներդնել ԱՀ տնտեսության զարգացման գործում:
Ուսումն ավարտելուց հետո Ա. Հակոբյանը վերադարձել է Արցախ: Նա հանդիպել է ԱՀ ԿԳՍ նախախար Նարինե Աղաբալյանի հետ՝ խոսել Կիպրոսում ունեցած իր հաջողությունների մասին: Նախարարը ողջունել և պատրաստակումություն է հայտնել աջակցելու Արտակի ներկայացրած ծրագրերին:
