ՍՏԵՓԱՆԱԿԵՐՏ, 18 հունվարի, ԱՐՑԱԽՊՐԵՍ: Սլավիկն այժմ իր մարզումներն անցկացնում է Երևանում և նախապատրաստվում է հունվարի 21-ին Մինսկում մեկնարկող Եվրոպայի առաջնությանը:

ArmSport-ը ներկա է գտնվել Սլավիկի հերթական մարզմանը, զրուցել մարզիկի, նրա մարզչի` Սամվել Հայրապետյանի հետ, որը նաև Սլավիկի հայրն է:

«Մի քանի օր առաջ ենք վերադարձել Լեհաստանից: Հիմա աշխատում ենք այնտեղ թույլ տված սխալների վրա, որ դրանք չկրկնվեն Եվրոպայի առաջնությունում: Սխալներ կային հիմնականում կարճ ծրագրում, ու հիմա անում ենք ամեն ինչ դրանք շտկելու և ԵԱ-ին լավագույնս ներկայանալու համար:

Ինչ վերաբերում է Լեհաստանում կայացած մրցաշարին, պետք է նշեմ, որ բացարձակ գոհ չեմ իմ գրանցած արդյունքից: Կարճ ծրագրում այնքան վատ սահեցի, որ վաղուց նման ելույթ չէի ունեցել: Ազատ ծրագրում, կարելի է ասել, արեցի իմ առավելագույնը: Վերջնական հաշվարկում 6-րդ հորիզոնականը զբաղեցրի, ինչն ինձ չի գոհացնում: Այդ մրցաշարից հետո ավելի ջղայնացած եմ պատրաստվում (ժպտում է), եռակի-քառակի ուժեր գործադրելով»,- ասում է Սլավիկ Հայրապետյանը  և նշում, որ հոգեբանության տեսանկյունից միշտ ավելի բարդ է ստացվում մրցաշրջանի առաջին մրցաշարը.

«Դրանից հետո արդեն սովորական է դառնում: Որքան շատ մրցաշարերի ես մասնակցում ու փորձ հավաքում, այնքան ավելի հեշտ է լինում տրամարդվածության ու հոգեբանության առումով: Տարիների ընթացքում Եվրոպայի կամ աշխարհի առաջնություններն ավելի հանգիստ են անցնում, ու մրցումներից հետո զարմանում ես, թե որքան հեշտ անցավ ամեն ինչ»:

Կարճ ծրագրում ունեցած թերացումների և դրանց վրա աշխատելու անհրաժեշտության մասին շեշտեց նաև Սամվել Հայրապետյանը:

«Տարեցտարի Սլավիկից ավելի ու ավելի բարձր արդյունքներ ենք ակնկալում, որը նա իր քրտնաջան աշխատանքով ցույց է տալիս: Փոքր քայլերով առաջ ենք գնում: 

Հիմա շատ ծանրաբեռնված ենք աշխատում կարճ ծրագրի վրա, քանի որ դրանից մեծ բան է կախված: Լեհաստանի միջազգային մրցաշարում Սլավիկը չկատարեց կարևոր թռիչքներն ու միավորներ չստացավ, ինչի արդյունքում նախավերջին տեղը զբաղեցրինք: Իսկ երկար ծրագրում Սլավիկը կատարեց բոլոր բարդությունները ու տեխնիկապես էլ շատ լավ ելույթ ունեցավ ու պետք է առաջին տեղը զբաղեցներ, բայց բավարարվեցինք երկրորդ տեղով: Երկու ծրագրի արդյունքում 6-րդ տեղը զբաղեցրինք: Երկար ծրագրում թե՛ Տալինի և թե՛ Լեհաստանի մրցաշարում Սլավիկն իր առավելագույնն է ցույց տվել` սահմանելով նաև անձնական ռեկորդներ: Հիմա մեր բոլոր մտքերն ու աշխատանքները կապված են կարճ ծրագրի սխալները շտկելու ու ավելի լավ հանդես գալու հետ:

Եվրոպայի առաջնության տղամարդկանց մենասահքում 37 գեղասահորդ է պայքարելու, որոնք թերևս 10-11 երկիր են ներկայացնելու: Առաջատարների թվում կնշեմ, իհարկե, ռուսներին, որոնցից մեկը ներկայացնում է Ադրբեջանը: Տղաների պայքարում մենք միայն Սլավիկին ունենք: Հիմա շատ երեխաներ, պատանինեներ ունենք, ովքեր սկսել են զբաղվել գեղասահքով ու մարզվում են Ռոդնինայի անվան մարզադպրոցում: Հուսով եմ` մոտ 10 տարուց կունենանք մեծ թվով մարզիկներ, որոնք, ինչու ոչ, կգերազանցեն Սլավիկին»,- նշեց Սամվել Հայրապետյանը:

Ռուսաստանից ժամանած անվանի խորեոգրաֆ Եկատերինա Պրոսկուրինան ևս մեծ սպասելիքներ ունի Սլավիկ Հայրապետյանի առաջիկա ելույթներից.

«Ամեն ինչ հիանալի է: Նախապատրաստությունը լավ է ընթանում, աշխատում ենք ու առաջ ենք շարժվում: Սպասելիքներս լավն են: Հույս ունեմ, որ գեղեցիկ ու հիանալի սահք կցուցադրի ու ամեն ինչ լավ կլինի: Ես, համենայն դեպս, հավատում եմ նրան: Սլավիկն իսկապես շատ տաղանդավոր է: Վստահ եմ` դեռ մեծ հաջողությունների կհասնի: Սամվել Սարգիսիչի հետ վաղուց է, ինչ աշխատում ենք, միասին ծրագրեր ենք բեմադրում, իսկ Սլավի հետ` երկրորդ տարին է. նա իսկապես մեծ պոտենցիալ ունի»:

Սլավիկ Հայրապետյանը մրցավայր կմեկնի հունվարի 22-ին, իսկ մինչ այդ դեռ մի քանի մարզում կանցկացնի: Նախորդ տարի Մոսկվայում կայացած ԵԱ-ում մեր հայրենակիցը կարճ և կամավոր ծրագրերի արդյունքում վաստակել էր 196.63 միավոր (անձնական ռեկորդ) և զբաղեցրել էր 15-րդ տեղը` ցույց տալով լավագույն արդյունքը թե´ իր կարիերայում և թե´ Հայաստանի տղամարդկանց գեղասահքի պատմության մեջ.

«Մոսկվայում ես կարծես իմ երկրորդ տանը լինեի: Ընկերներիցս ու բարեկամներիցս շատերն էին եկել ելույթներս դիտելու ու ինձ աջակցելու, ինչը ինձ շատ էր ոգևորել: Ժամանակը ցույց կտա` կկարողանա՞մ նոր ռեկորդներ սահմանել: Չեմ ցանկանում ժամանակից առաջ ընկնել: Ամեն դեպքում, քրտնաջան աշխատում եմ ավելի լավ հանդես գալու համար»,- ասում է Սլավիկը ու ներկայացնում նաև հետագա ծրագրերը.

«Մինսկում կայանալիք Եվրոպայի առաջնությունից հետո փետրվարն ինձ մոտ հանգիստ է լինելու, չեմ ունենալու որևէ մրցաշար: Արդեն մարտի սկզբին կկայանա ձմեռային Ունիվերսիադան Կրասնոյարսկում, որին ևս կմասնակցեմ, իսկ դրանից հետո վերադառնալու ենք Երևան ու նախապատրաստվենք Ճապոնիայում կայանալիք Աշխարհի առաջնությանը` դարձյալ մարտ ամսին»:

Նշենք` Եվրոպայի առաջնության մենասահորդների պայքարում, Սլավիկ Հայրապետյանից բացի, մեր երկիրը կներկայացնի նաև Անաստասիա Գալուստյանը, որն իր նախապատրաստական փուլն անցնում է Մոսկվայում: