Չարորակ հիվանդությունների բուժումն տարիներ շարունակ Արցախում իրականացվում է պետպատվերի շրջանակներում, բացառությամբ այն դեպքերի, երբ անհրաժեշտություն է առաջանում թանկարժեք դեղամիջոցներով բուժում:
Չարորակ հիվանդությունների բուժումն Արցախում իրականացվում է պետպատվերի շրջանակներում. ուռուցքաբանական ծառայության ղեկավար
ՍՏԵՓԱՆԱԿԵՐՏ, 4 փետրվարի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է Ստեփանակերտի «Հանրապետական բժշկական կենտրոն»-ի ուռուցքաբանական ծառայության ղեկավար Արմեն Հայրիյանը՝ նշելով, որ նման դեպքերում էլ քաղաքացիներն անհրաժեշտ բժշկական փաստաթղթեր են ներկայացնում, և ԱՀ առողջապահության նախարարությունը մինչև 50 %-ի ֆինանսական ծախսերի փոխհատուցում է կատարում:
Ա. Հայրիյանի խոսքով՝ Արցախում արդեն մի քանի տարի է, ինչ կազմակերպվում են քաղցկեղի դեմ պայքարի տարբեր ակցիաներ: Օրինակ, ԱՀ առողջապահության նախարարության կողմից տարիներ շարունակ մարտի 8-ից ապրիլի 7-ը՝ Կանանց տոների միամսյակի կապակցությամբ անց են կացվում անվճար հետազոտություններ
«Բուժանձնակազմի համար կազմակերպում ենք տարբեր սեմինարներ, դրանց թեմաները վերաբերում են քաղցկեղի դեմ պայքարի պրոֆիլակտիկ աշխատանքներին: Այս տարի էլ կշարունակենք նաև մի շարք սկրինինգային աշխատանքներ. կներդնենք նաև նոր սկրինիգային ծրագրեր: Տարվա ընթացքում այցելություններ ենք կազմակերպում դեպի շրջաններ՝ ներկայացնում քաղցկեղի դեմ պայքարի առաջնային օղակի կատարվելիք աշխատանքնները և այն ախտանիշները,որոնց առկայության դեպքում հիվանդները պարտավոր են դիմել բժիշկների: Շրջանային հիվանդանոցներում նախատեսում ենք իրականացնել հիվանդների ընդունելություն և հետազոտություն:Սկրինինգային աշխատանքների գերնպատակը հիվանդության վաղ հայտնաբերելիությունն է»,-մանրամասնել է Ա. Հայրիյանը՝ ավելացնելով, որ, ինչպես ողջ աշխարհում, այնպես էլ Արցախում, քաղցկեղով հիվանդների թիվն աճում է:
Խոսելով քաղցկեղի հիվանդության առաջացման պատճառների մասին՝ Ա. Հայրիյանն ասել է, որ կան այդ հիվանդությանը նպաստող մի շարք գործոններ, որոնցից են ծխախոտի չարաշահումը, որի արդյունքում առաջանում է թոքերի, բերանի խոռոչի լորձաթաղանթի, շրթունքների ուռուցքներ: Մեծ նշանակություն ունի նաև սննդակարգը, առողջ ապրելակերպը, որոնք ևս հիվանդության առաջացման պատճառներ են:
«Կանանց մոտ առավել հաճախ հանդիպող չարորակ հիվանդությունները կրծքագեղձի և սեռական օրգանների՝ հիմնականում արգանդի վզիկի, ձվարանների ուռուցքներն են: Ամբողջ աշխարհում այս հիվանդությունը տարեցտարի երիտասարդանում է»,-տեղեկացրել է ուռուցքաբանության ծառայության ղեկավարը:
