Ադրբեջանում իմ նկատմամբ նոր քրեական գործեր են հարուցվել. Ալեքսանդր Լապշին
ՌԴ և Իսրայելցի հայտնի բլոգեր Ալեքսանդր Լապշինը Հայաստանում է: Նա ընտանիքի հետ ճանապարհորդում է ՀՀ քաղաքներով։
Ադրբեջանում իմ նկատմամբ նոր քրեական գործեր են հարուցվել. Ալեքսանդր Լապշին
ՍՏԵՓԱՆԱԿԵՐՏ, 30 մարտի, ԱՐՑԱԽՊՐԵՍ: SHANTNEWS.am-ը հայտնի բլոգերին հանդիպել է Գյումրիում, որտեղ նա անցկացրել է հայաստանյան արձակուրդների 4 օրը:
Հիշեցնենք` Լապշինը 2017 թվականին Ադրբեջանում 7-ամսով կալանավորվել էր այն բանի, համար, որ այցելել էր Արցախ և քննադատել Ադրբեջանի իշխանություններին: ԼապշինըSHANTNEWS.am-ի թղթակցի հետ զրույցում ասել է, որ Ադրբեջանում իր նկատմամբ նոր քրեական գործեր են հարուցվել:
«Իմ նկատմամբ Ադրբեջանում նոր քրեական գործեր են հարուցվել։ Ինձ մեղադրում են այն բանի համար, որ ադրբեջանական բանտից ազատվելուց հետո հանդգնել եմ քննադատել երկրի ղեկավարին, հոդվածներ եմ գրել` ի պաշտպանություն ադրբեջանական ընդդիմության և բանտերում փակված լրագրողների և բլոգերների։
Ինձ մեղադրում են Ալիևի իշխանությունը տապալելու փորձի մեջ։ Գուցե մտածում են, որ ես ուզում եմ զբաղեցնել նրա տեղը: Ադրբեջան անպայման կմեկնեմ այն օրը, երբ Ալիևի դարաշրջանը կավարտվի։ Այսօր ինձ այնտեղ չեն սպասում: Ես նաև Բելառուս չեմ մեկնի, քանի դեռ այդ երկիրը ղեկավարում է Ալիևի մեծ եղբայրը։ Նրանք գուցե ուզենան վրեժխնդիր լինել, այնպես որ այդ երկու երկրներն առայժմ ինձ համար փակ են»,- ասել է Ալեքսանդր Լապշինը:
Իսկ Հայաստանը, ըստ բլոգերի, այն երկիրն է, ուր անընդհատ ուզում է վերադառնալ: Նրան հետաքրքրում է Հայաստանի պատմությունը, ճարտարապետությունը:
Ամիսներ առաջ Լապշինը նաև հայ-թուրքական սահմանի Շիրակի մարզի հատվածում է եղել` փորձելով տեսնել Անի պատմական մայրաքաղաքը: