ՍՏԵՓԱՆԱԿԵՐՏ, 30 օգոստոսի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ` այս մասին նախօրեին կայացած ԿԸՀ հերթական նիստի ժամանակ ասել է հանձնաժողովի նախագահի փոխարինող Եղիշե Արզումանյանը:

 

Նրա խոսքով` ինքնաբացարկի դիմում ներկայացնելու կապակցությամբ համայնքի ղեկավարի գրանցված 416 թեկնածուներից՝ 6 և ավագանու անդամների գրանցված 1401 թեկնածուներից՝ 7 թեկնածուների  գրանցումն ուժը կորցրած է ճանաչվել:

 

410 համայնքի ղեկավարի թեկնածուներից 155-ը (37,8 %) գործող համայնքի ղեկավարներ են, 15 թեկնածուներ   (3,7 %) կանայք են:

 

96 համայնքի ղեկավարի թեկնածու (23,4 %) «Ազատ հայրենիք» կուսակցության անդամ է, 14-ը (3,4 %)՝ Արցախի Ժողովրդավարական Կուսակցության, 11-ը (2,7%)՝ «Հայ Հեղափոխական Դաշնակցություն» կուսակցության, 278-ը (67,8%) անկուսակցական են: 228  համայնքներում գրանցվել են 416 համայնքի ղեկավարի թեկնածուներ, որոնցից 105 համայնքներում առաջադրվել են մեկական, 76 համայնքներում` երկուական, 39 համայնքներում` չորսական, 33 համայնքներում` երեքական և 5 համայնքներում` հինգ և ավելի համայնքի ղեկավարի թեկնածուներ: Գրանցված 1401 ավագանու անդամներից 106 համայնքներում ավագանու անդամների 5-ական թեկնածու է առաջադրվել, 29 համայնքներում` 6-ական, 19 համայնքներում` 7-ական, ևս 19 համայնքներում` 8-ական, 18 համայնքներում` 9-44 ավագանու անդամի թեկնածուներ: Այստեղ ընդգրկված է նաև Ստեփանակերտ քաղաքը, որտեղ առաջադրվել է 42 թեկնածու:

 

Նիստում քննարկվել և սահմանվել են ՏԻՄ ընտրությունների քվեաթերթիկների նմուշները: Համայնքի ավագանու անդամների քվեաթերթիկները կունենան սպիտակ գույն, համայնքի ղեկավարի ընտրությունների քվեաթերթիկները վարդագույն են լինելու:

Բոլոր 218  համայնքներում կազմավորվել են 277 ընտրական տեղամասեր, որտեղ ընդգրկվել են 2155 տեղամասային ընտրական հանձնաժողովի անդամներ, որոնցից 1524-ը իգական սեռի, իսկ 631-ը` արակա սեռի ներկայացուցիչներ են: Ըստ կուսակցական պատկանելության` 424-ը` «Ազատ հայրենիք», 215-ը` Արցախի Ժողովրդավարական, 67-ը` «Հայ Հեղափոխական Դաշնակցություն», 4-ը` «Շարժում-88», 4-ը` «Ազգային Վերածնունդ», 7-ը` Կոմունիստական և 3-ը այլ կուսակցությունների անդամներ են, իսկ 1431-ը անկուսակցականներ են:

 

Այսօրվա դրությամբ ԿԸՀ հավատարմագրվել են 10 զանգվածային լրատվամիջոցներ, որում ընդգրկված են 33 ներկայացուցիչներ և 4 տեղական դիտորդություն իրականացնող կազմակերպություններ, որոնց կազմում ընդգրկված են 160 դիտորդներ:

Ե. Արզումանյանը տեղեկացրել է, որ արդեն հավատարմագրվել են նաև 2 միջազգային դիտորդական կազմակերպություններ` ընդգրկված 75 դիտորդով: Արցախի ՏԻՄ ընտրություններին առաջին անգամ է միջազգային դիտորդական առաքելություն իրականացվելու:

 

Հաջորդիվ քննարկվել է ընտրական հանձնաժողովների անդամության թեկնածուների համար ԱՀ կենտրոնական ընտրական հանձնաժողովի կողմից ընթացիկ տարվա հունիս-հուլիս ամիսներին կազմակերպված և անցկացված մասնագիտական դասընթացների արդյունքների ամփոփման հարցը: Նշված ժամանակահատվածում մասնագիտական դասընթացներ են անցել և որակավորման վկայականներ ստացել 

ԱՀ ընտրական իրավունք ունեցող 1032 քաղաքացիներ, որոնցից 342-ը (33,1%)՝ առաջին անգամ: Որակավորում ստացած քաղաքացիներից  693-ը (67,2%) ունեն  բարձրագույն, 154-ը (14,9%)՝ միջին մասնագիտական, 185-ը (17,9%)` միջնակարգ կրթություն: Առաջիկա ընտրություններին բոլոր ընտրական հանձնաժողովները կհամալրվեն անհրաժեշտ թվով որակավորում ստացած անդամներով:

Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -44-: