Այսօր՝ փետրվարի 13-ին, ԱՀ նախագահ Բակո Սահակյանն իր նստավայրում ընդունել է արցախյան ազգային-ազատագրական շարժման մի խումբ ակտիվիստների:
32 տարի առաջ՝ այս օրը, սկսվեց արցախյան ազգային-ազատագրական շարժումը. ԱՀ նախագահն ընդունել է ակտիվիստների
ՍՏԵՓԱՆԱԿԵՐՏ, 13 փետրվարի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ հանդիպմանն ԱՀ Արցախի թեմի առաջնորդ Պարգև արքեպիսկոպոս Մարտիրոսյանը հանդես է եկել օրհնության խոսքով:
Նա կարևորել է արցախյան ազգային-ազատագրական շարժման ակտիվիստների աշխատանքը և հավաստիացրել, որ հայրենիքի համար նրանց կատարածը մեծ առաքելություն է, ու այն դարեր շարունակ կհիշվի սերունդների կողմից:
ԱՀ նախագահ Բակո Սահակյանը, ողջունելով ներկաներին, իր խոսքում ասել է, որ ամեն անգամ հայ ժողովուրդը փորձում է նորովի իմաստավորել 1988 թվականի իրադարձությունները:
Նախագահը մասնավորապես ավելացրել է. «Այն, որ մենք ձերբազատվել ենք գերությունից, այն, որ այլևս ցեղասպանություն չենք ապրելու, որ դաստիարակվել են սերունդներ, ովքեր իրենց հայրերի և ավագների արժանի զավակներն են, ես կապում եմ Արցախյան ազգային-ազատագրական շարժման հետ: Շարժման ազդեցությունն այնքան ուժեղ էր, որ դարեր շարունակ հիշելու է ժողովուրդը: 88-ի շարժման շնորհիվ մենք ձեռք ենք բերել այնպիսի հնարավորություն, որ մշտապես և ամենուր տանելու է նորանոր հաղթանակների: Մենք այսօր ապրում ենք մի ժամանակաշրջանում, որտեղ շարժման ակունքներում կանգնած մեր հայրենակիցները շարունակում են իրենց ազդեցությունն ունենալ երկրի զորացման և շենացման գործում: Տեղին եմ համարում այսօր հիշել բոլոր այն նահատակներին, ովքեր նվիրական ծառայություններ են մատուցել մեր հայրենիքին, բայց այսօր նրանք ֆիզիկապես մեզ հետ չեն. նրանց հիշատակը միշտ բոլորս էլ վառ ենք պահելու»:
