Հանրապետության տարածքում անվտանգ երթևեկություն կազմակերպելու համար ԱՀ Ճանապարհային ոստիկանությունը ջանք ու եռանդ չի խնայում:
Հանրապետությունում ճանապարհատրանսպորտային պատահարների թիվը նվազել է
ՍՏԵՓԱՆԱԿԵՐՏ, 13 մարտի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է ԱՀ ոստիկանության հասարակայնության հետ կապի և լրատվության ծառայության պետ Գառնիկ Ալեքսանյանը:
Նրա խոսքով՝ ճանապարհային երթևեկության անվտանգությունն ապահովելու համար ԱՀ ոստիկանության գործադրած բոլոր հնարավոր ջանքերը, անշուշտ, վերջին շրջանում հաջողություններ գրանցել են, որոնք, իհարկե, գովելի են: Ըստ մեր զրուցակցի՝ եթե 2020 թվականի հունվար ամսում հանրապետության տարածքում գրանցվել է արագության գերազանցման 1467, անսթափ վիճակում մեքենա վարելու` 105, իսկ առանց վարորդական իրավունքի ավտոմեքենա վարելու 119 դեպք, ապա փետրվար ամսում գրանցվել է արագության գերազանցման` 1334, անսթափ վիճակում մեքենա վարելու` 94, առանց վարորդական իրավունքի ավտոմեքենա վարելու`100 դեպք:
«Հունվար-փետրվար ամիսներին հանրապետությունում գրանցվել է 13 ճանապարհատրանսպորտային պատահար, որոնց հետևանքով մահացել է 2 և վիրավորվել 12 քաղաքացի, որը, նախորդ տարվա նույն ժամանակահատվածի համեմատ, 1-ով նվազել է: Պատահարների աճ է գրանցվել Մարտակերտի և Քաշաթաղի շրջաններում, նվազում է գրանցվել Մարտունու, Ասկերանի, Շահումյանի և Շուշիի շրջաններում: Այս տարվա պատահարների մեծ մասը՝ մոտ 70 %-ը, տեղի է ունեցել հիմնականում վարորդների անուշադրության և անփութության պատճառով, կան այլ պատճառներ ևս: Այս առումով գրանցված հաջողությունները, անշուշտ, բավարար չեն, և Ճանապարհային երթևեկության կարգավորման համար մշտապես անհրաժեշտ է սահմանել և կիրառել արդյունավետ տարբերակներ: Միայն ամենօրյա տքնաջան աշխատանքի շնորհիվ է հնարավոր հասնել ցանկալի արդյունքի: Հիմնվելով գործող տվյալների վրա՝ հանրապետության տարածքում ամենաշատ ճանապարհատրանսպորտային պատահարները բաժին են ընկնում մայրաքաղաք Ստեփանակերտին: Անկախ ամեն ինչից՝ հիշեցնում ենք ևս մեկ անգամ. անվտանգ երթևեկություն իրականացնելու համար վարորդներից պահանջվում է հետևել ճանապարհային նշաններին, ավտոմեքենան վարել սթափ վիճակում, չգերազանցել արագությունը և լինել զգոն: Ճանապարհային երթևեկության վերլուծությունները ցույց են տալիս, որ հետիոտնի կատարած խախտումներից առաջացող ճանապարհատրանսպորտային պատահարները ևս հաճախակի բնույթ են կրում, ուստի հետիոտնից պահանջվում է ճանապարհը հատել միմիայն հետիոտնային անցումներով»,-մասնավորապես ասել է Գ. Ալեքսանյանը:
