ՍՏԵՓԱՆԱԿԵՐՏ, 11 օգոստոսի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝  նիստին  բացման  խոսքով  հանդես  է  եկել  ԱՀ  Ազգային  ժողովի  նախագահ  Արթուր  Թովմասյանը:

 

Նիստը   սկսվել  է  Բեյրութում  տեղի  ունեցած   պայթունի  հետևանքով  անմեղ   զոհերի  հարազատներին    ուղղված   զորակցության   և   վշտակցության     խոսքերով:

«Բեյրութում  տեղի  ունեցած   պայթունի  հետևանքով    մարդակային   կորուստների   ցավն   անչափելի   մեծ  է  և   դաժան: Մեր   վշտակցությունն  ենք  հղում  Լիբանանի    եղբայրական  ժողովրդին, որոնց  մեջ  նաև  մեր  ազգակիցներն    են. տոկունություն  և  արիություն  բոլորին՝  արհավիրքի  ցավին  դիմանալու  համար: Ինչպես  տեղյակ  եք  ԱՀ  նախագահի    հանձնարարությամբ  ստեղծվել  է   աշխատանքային   խումբ  Լիբանանի  հայկական    համայնքին  նյութական  օգնություն   ցուցաբերելու  համար: ԱԺ  պատգամավորներն  ու  աշխատակազմը  ևս   մասնակիցը  կլինեն    այդ   աշխատանքներին»,- մասնավորապես  ասել է  Ա.  Թովմասյանը:

 

ԱԺ  նախագահն  իր  խոսքում   նաև  տեղեկացրել  է, որ   խորը  ցավով   են   իմացել   ԱՀ  ԱԺ  պատգամավոր  Աշոտ   Դանիելյանի  մոր   անժամանակ   մահվան, ինչպես  նաև   Խորհրդարանի      աշխատակցուհու  որդու  անսապասելի  կյանքից   հեռանալու մասին  գույժը, որը   ցնցել է  բոլորին:

Ա. Թովմասյանը պատգամավորների  անունից   ցավակցություն  է հայտնել հանգուցյալների     հարազատներին, որից  հետո    ներկաները   մեկ   րոպե  լռությամբ  հոտնկայս   հարգել  են    նրանց   վիշտը:

 

Այնուհետև   հաստատվել  է   Ազգային ժողովի   արտահերթ   նիստի  օրակարգը, որից  հետո՝    քննարկվել   օրենսդրական նախագծեր   և  մի շարք հարցեր:

ԱՀ ֆինանսների նախարար Վահրամ Բաղդասարյանը  նիստին   ներկայացրել  է   «Արցախի Հանրապետության 2020 թվականի պետական բյուջեի մասին» օրենքում փոփոխություններ կատարելու մասին»   և  «Պետական պաշտոններ զբաղեցնող անձանց վարձատրության մասին» օրենքների նախագծերը և  պատասխանել    պատգամավորների  հարցերին:

Անդրադառնալով  «ԱՀ 2020  թվականի  պետական բյուջեի մասին» օրենքում փոփոխություններ կատարելու անհրաժեշտության մասին՝ նախարարը նշել է, որ  այն առաջացել է ԱՀ  նախագահի 2020-2025 թվականների գործունեության ծրագրերի որոշ դրույթների իրականացման  անհրաժեշտությունից: 

Վ. Բաղդասարյանը  ներկայացրել է ըստ ոլորտների առաջարկվող փոփոխությունները, որոնց արդյունքում 2020 թ-ի պետական բյուջեի եկամուտները կկազմեն 126 մլրդ 49 մլն 309,2հազ դրամ, ծախսերը՝ 135 մլրդ 650մլն 717,7հազ դրամ, դեֆիցիտը կկազմի պակասուրդի 9 մլրդ  601 մլն 318,5 հազ դրամ:

Գլխադասային հանձնաժողովի դրական եզրակացությունը ներկայացրել է  ֆինանսաբյուջետային և տնտեսական կառավարման հարցերի մշտական հանձնաժողովի նախագահ Արթուր Հարությունյանը:

 

«Արցախի Հանրապետության 2020 թվականի պետական բյուջեի մասին» օրենքի նախագիծն առաջին ընթերցմամբ  ընդունվել է ՝ 26  կողմ  և  6  դեմ   ձայների  հարաբերակցությամբ:

Խոսելով  «Պետական պաշտոններ զբաղեցնող անձանց վարձատրության մասին» օրենքի նախագծի   կարևորությունից, Վ. Բաղդասարնը նշել է, որ   նախագծի մշակման անհրաժեշտությունը ծագել է կառավարության կառուցվածքում կատարված փոփոխությամբ:

Օրենքի  նախագիծն  առաջին  ընթերցմամբ  ընդունվել  է 24  կողմ  և  8  դեմ   ձայների  հարաբերակցությամբ:

Արտահերթ   նիստին  ներկա  ԱՀ  նախագահ  Արայիկ  Հարությունյանն  իր խոսքում  անդրադարձել է   պատգամավորների   կողմից  բարձրացված  հարցերին  և   նշել   դրանց   կարևորությունն   ու  անհրաժեշտությունը՝ կրկին  հավաստիացնելով, որ   իրականացվող    բոլոր    աշխատանքները    խիստ   վերահսկվում  են:

Նիստին    մտքերի   փոխանակման   փուլում   մի  շարք  պատգամավոր   հանդես   են  եկել  առաջարկություններով:

Վերջում  ԱՀ  ԱԺ  նախագահ  Արթուր  Թովմասյանը     նշել  է, որ,      ըստ   օրենքի՝  արտահերթ   նիստը   կշարունակվի   այսօր՝   օգոստոսի  11-ին,  ժամը՝   18:25-ին: