ՍՏԵՓԱՆԱԿԵՐՏ, 27 օգոստոսի, ԱՐՑԱԽՊՐԵՍ։ «Արցախպրես»-ի  թղթակցի   հաղորդմամբ՝  այս  մասին, այսօր  կայացած  «Կորոնավիրուսի   ազդեցությունը  կրթության  իրավունքի   իրացման   վրա. հիմնախնդիրներ  և   լուծումներ»  թեմայով      քննարկման   ժամանակ   ասել  է  ԱՀ  կրթության, գիտության  և  մշակույթի    նախարար   Լուսինե  Ղարախանյանը:

 

Նրա  խոսքով՝    միայն  բուհերում  դասերը  սկսվելու  են   սեպտեմբերի  1-ից:

 

Նախարարը   տեղեկացրել է, որ  հանրակրթական   դպրոց    հաճախող  առաջին  դասարանցիները՝  սեպտեմբերի   1-ին,   1-1,5  ժամով  ուսուցիչների  հետ  հաճախելու  են   դպրոց՝   ի   նշանավորումն  գիտելիքի   օրվան:

 

«Մենք  այն  կարծիքին  ենք,   որ   սովորողները   դիմակ  դասապրոցեսի   ընթացքում  չպետք  է   կրեն.  ներկա  դրությամբ  մինչև   10  տարեկան  երեխաները    հաստատ  դիմակ   չեն  կրելու. մնացածների  հարցերը  դեռ  քննարկվում  են: Դասերը  լինելու  են  վեցօրյա՝  40  րոպեանոց: Ուսումնական  հաստատություններում  արգելվելու  է   զանգվածային  միջոցառումների  կազմակերպումը:  Մայրաքաղաքի  բոլոր   դպրոցներում   արտաուսումնական  պարապմունքները  չեղարկվելու են, իսկ   100-ից  քիչ   աշակերտ  ունեցող  դպրոցներն  արտաուսումնական  պարապմունքներն  անց  են  կացնելու, եթե   դպրոցն  ունի  տարծքային  համապատասխան  հնարավորություններ: 100-ից  ավել  աշակերտներ  ունեցող  ուսումնական  հաստատություններում  դասապրոցեսը  կազմակերպվելու  է   երկհերթ, իսկ 100-ից  քիչ  աշակերտների  դեպքում՝  մեկ  հերթով: Ուսումնական  հաստատություններում   ժողովների  և  հավաքների  գործընթացը   պետք  է իրականցնենք  հեռավար  եղանակով  կամ   բացօթյա  միջավայրում՝   պահպանելով  հակահամաճարակային  իրավիճակը»,- մասնավորապես  ասել է նախարարը: 

 

Խոսելով   բուհերի  մասին՝  Լ. Ղարախանյանը  նշել  է, որ Շուշիի տեխնոլոգիական համալսարանում դասապրոցեսը կկազմակերպվի առկա և հիբրիդային ձևաչափերով՝ պայմանավորված դասավանդվող առարկայի առանձնահատկություններով։ Շուշիի   տեխնոլոգիական համալսարանը  լուծել  է  նաև  երթուղայինների   հարցը:

 

Արցախի  պետական  համալսարանի  առաջին  կուրսեցիները  սեպտեմբերի  1-ից  կանցնեն  առկա  ուսուցման,  իսկ  երկրորդ, երրորդ  և  չորրորդ  կուրսի  ուսանողները   դասապրոցեսն   առկա   կարգով  կսկսեն    սեպտեմբերի  7-ից:  Մագիստրատուրայի  բաժնի    ուսանողների  համար    համալասարանը  մշակել  է  հեռավար  կրթության  հարթակ. սեպտեմբերի   7-ից    1-2 շաբաթով մագիստրանտները կհաճախեն բուհ՝ տիրապետելու հեռավար ուսուցման  հարթակի հմտություններին: Այնուհետև   մինչև   իրավիճակի  կարգավորումը  մագիստրանտները  դասերը   կկազմակերպեն   հեռավար  եղանակով: