ՍՏԵՓԱՆԱԿԵՐՏ, 9 սեպտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ հանդիպմանը Սամվել Բաբայանը ներկայացրել է ԱԽ գրասենյակի գործունեությունը, անդրադարձել օրակարգային մի շարք թեմաների, ապա պատասխանել պատգամավորների բարձրացրած հարցերին:

Ներկայացնելով Անվտանգության խորհրդի գրասենյակի կառուցվածքը և դրա առջև դրված խնդիրները՝ Ս. Բաբայանն ասել է, որ կառույցը Հանրապետության Նախագահին կից մարմին է, որը հիմնականում կատարում է Նախագահի կարգադրությունները և իրականացնում ծրագրային ռազմավարությունը:

ԱԽ քարտուղարի խոսքով՝ իրենց տրված լիազորությունները, ելնելով Նախագահի հրամանից, ամբողջովին գաղտնի են և հրապարակման ենթակա չեն:

Ներկայումս Անվտանգության խորհրդի գրասենյակը՝ նախարարությունների հետ համատեղ, մշակում է ծրագրեր, որոնք համաձայնեցվում են շահագրգիռ կողմերի հետ: Ս. Բաբայանի խոսքով՝ եթե ծրագիրը մշակվում է և հաստատվում ԱԽ խորհրդում, սակայն նախարարը չի կարողանում իրագործել այն, ապա տվյալ գերատեսչության պատասխանատուն պետք է հեռանա այդ պաշտոնից:

ԱԽ քարտուղարը կարծում է, որ Հանրապետությունում պետք է փոխվի և ավելի հստակեցվի օրենսդրական ամբողջ փաթեթը: Անդրադառնալով բանակին՝ Ս. Բաբայանը նշել է, որ իրենց գրասենյակի կողմից մշակվում են ռազմավարական նշանակության ծրագրեր, որոնք խթան կհանդիսանան բանակի զարգացման համար:

Պատգամավորների հետ հարցուպատասխանի ընթացքում ԱԽ քարտուղարն անդրադարձել է նաև Արցախում աշխարհազորի ստեղծմանը: Նրա խոսքով՝ հաջորդ շաբաթ Անվտանգության խորհուրդը գումարելու է առաջին նիստը, որի ընթացքում քննարկվելու է նաև այդ հարցը, թե ինչ մեխանիզմներով է գործելու աշխարհազորը:

«Այս առումով նշեմ, որ մշակվում է ռազմավարական ծրագիր, որը մեզ հնարավորություն կտա ամբողջովին լինելու վստահ մեր ուժերի վրա և չունենալու որևիցե խնդիր բոլոր առումներով»,- ընդգծել է Ս. Բաբայանը:

Ամփոփելով հանդիպումը՝ Ս. Բաբայանը պատրաստակամություն է հայտնել ակտիվորեն համագործակցելու խորհրդարանական ուժերի հետ: