Թաղավարդ գյուղի 145 տուն մնացել է թշնամու վերահսկողության ներքո. գյուղացիները պարբերաբար լսում են կրակոցներ
Թաղավարդի կորցրածն ու նորի տեսլականը. ներկայացրել է համայնքի ղեկավարը
ՍՏԵՓԱՆԱԿԵՐՏ, 15 ապրիլի, ԱՐՑԱԽՊՐԵՍ: Արցախյան երրորդ պատերազմի արդյունքում ԱՀ Մարտունու շրջանի Թաղավարդ գյուղի 145 տուն մնացել է թշնամու վերահսկողության ներքո:
«Արցախպրես»-ի թղթակցի հետ զրույցում, խոսելով Թաղավարդի 145 բնակելի տների՝ թշնամու կողմից բռնազավթված լինելու մասին, համայնքի ղեկավար Օլեգ Հարությունյանը նշեց, որ պատերազմի հետևանքով 520 բնակիչ մնացել է անօթևան. այժմ նրանք ժամանակավորապես ապրում են Ստեփանակերտում, Մարտունիում, Ասկերանի շրջանի գյուղերում և Մայր հայրենիքում:
Համայնքի ղեկավարը տեղեկացրեց, որ պատերազմից հետո Թաղավարդի բնակիչների 80 տոկոսը վերադարձել է, բնակելի տներ ունենալու դեպքում՝ մյուս մասը նույնպես մեծ ցանկություն ունի հայրենի գյուղ վերադառնալու։
Կալեր թաղամասի բոլոր 17 աշակերտներն արդեն սովորում են հարազատ կրթօջախում, թաղավարդցի ևս 40 աշակերտ հաճախում է Կարմիր շուկայի դպրոցը։
«Կառավարության կողմից մշակվել է ծրագիր, ըստ որի՝ Թաղավարդի հարևանությամբ գտնվող Կարմիր շուկայի վարչական տարածքում կկառուցվի նոր բնակելի թաղամաս, որը կտրամադրվի ինչպես մեր համագյուղացիներին, այնպես էլ Շեխերի անօթևան մնացած բնակիչներին», ֊ ասաց Օ. Հարությունյանը։
