Հայաստանում «Կինոյի մասին» օրենք են մշակում, և կինոգործիչները գոհ են այդ նախաձեռնությունից:
«Կինոյի մասին» օրենքը կնպաստի միջազգային համագործակցության ընդլայնմանը
ՍՏԵՓԱՆԱԿԵՐՏ, 17 ՄԱՐՏԻ, ԱՐՑԱԽՊՐԵՍ։ «Արմենպրես»-ի հետ զրույցում խոսելով «Կինոյի մասին» օրենքի մասին` Հայաստանի կինեմատոգրաֆիստների միության նախագահ Ռուբեն Գևորգյանցը համոզմունք հայտնեց, որ ամեն ինչ, այդ թվում նաև կինոն, պետք է օրենքով կարգավորվի:
«Կինոն էլ պետք է իր օրենքն ունենա: Շատ բարդ հարցեր կան՝ վաճառքի թույլտվություն, վարձույթ և այլն: Աշխարհի գրեթե բոլոր երկրներում նման օրենք կա: Հայ կինոգործիչները մեծ առավելություններ կունենան: Մենք մասնակցում ենք քննարկումներին: Հաճախ այնքա՜ն ֆիլմեր են ցուցադրվում այստեղ. օրենք չկա, չենք կարող արգելել: Օրինակ՝ գեյերի, լեսբուհիների և չգիտեմ ինչի մասին: Օրենքի առկայության դեպքում իրավիճակը կշտկվի: Կինոմիությունն օրենքի ստեղծման հարցում մեծ դեր ունի, միշտ մենք ենք հարցը բարձրացրել»,-նշեց Ռուբեն Գևորգյանցը: Նրա խոսքով՝ օրենքը նաև տարբեր այլ հարցեր է կարգավորելու:
Երևանի թատրոնի և կինոյի պետական ինստիտուտի ռեկտոր կինոգետ Դավիթ Մուրադյանի համոզմամբ՝ որևէ օրենք որևէ արվեստագետի չի դարձնում ավելի տաղանդավոր, քան ինքը կա:
«Երբ մենք խոսում ենք միջազգային կինոհամագործակցության մասին, ապա հատկապես այս պարագայում «Կինոյի մասին» օրենքն ունենալը դառնում է կարևոր, որովհետև այդպիսի համագործակցության մեջ այնքան էլ հաճախ և պատրաստակամորեն չեն մտնում, եթե դու չունես օրենսդրորեն պաշտպանված կինոարտադրություն և կինոյի զարգացման օրենսդրական նորմեր»,-նշեց Դավիթ Մուրադյանը:
Նրա խոսքով՝ աշխարհի զարգացած երկրներն ունեն այդպիսի օրենք: «Եվ երբ նրանք ուզում են արտադրական հարաբերություններ ստեղծել քեզ հետ, առաջին հերթին հարցնում են. «Իսկ ձեզ մոտ այդպիսի օրենք կա՞», որպեսզի կարողանան օրենսդրական հիմքի վրա կառուցել փոխադարձ արտադրական և գործընկերական հարաբերություններ: Այս իմաստով օրենքը շատ կարևոր է և օգնելու է մեզ միջազգային համատեքստում: Մյուս կողմից՝ օրենքի ընդունումը կստեղծի որոշակի նախադրյալներ. պետության մասնակցությունն օրենսդրորեն ամրագրված կլինի, ոչ պետական կապիտալի գործունեությունը և մասնակցությունը կինոյում կլինի օրենսդրորեն ուղղորդված: Սա, ի վերջո, կինոկյանք և կինոգործ կազմակերպելու համար ավելի բարենպաստ հնարավորություն է»,-եզրափակեց նա:
ՀՀ մշակույթի նախարար Հասմիկ Պողոսյանի գլխավորությամբ մի քանի օր առաջ տեղի է ունեցել «Կինոյի մասին» օրենքի նախագծի մասնագիտական հանձնաժողովի անդրանիկ նիստը: Ի կատարումն ՀՀ նախագահի հանձնարարականի` «Կինոյի մասին» ՀՀ օրենքի նախագծի մշակման վերաբերյալ, ՀՀ մշակույթի նախարարի հրամանով ստեղծվել է մասնագիտական հանձնաժողով: Հանձնաժողովում ընդգրկված են ոլորտի առաջատար մասնագետները:
