Ամերիկայի հայ ավետարանչական ընկերակցության նախաձեռնությամբ և միջոցներով Ստեփանակերտի «Օլիմպ պլյուս» հյուրանոցային համալիրի տարածքում կհիմնվի մանկապարտեզ։
Ստեփանակերտը նոր մանկապարտեզ կունենա
ՍՏԵՓԱՆԱԿԵՐՏ, 27 մայիսի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ այսօր՝ մայիսի 27֊ին, Ամերիկայի Հայ Ավետարանչական Ընկերակցության գործադիր տնօրեն Զավեն Խանջյանը և Ընկերակցության Արցախի ներկայացուցիչ Վիկտոր Կարապետյանը եղել են մանկապարտեզի համար նախատեսվող տարածքում և պլանավորել անելիքները։
Մեզ հետ զրույցում Զ.Խանջյանն ասել է, որ, հաշվի առնելով այն հանգամանքը, որ պատերազմական գործողություններից հետո մեր հայրենակիցները կորցրել են բնակավայրերը, իսկ երեխաները՝ դպրոցներն ու մանկապարտեզները, ուստի պետք է ուշադրություն դարձվի այդ հարցին։ «Արցախյան ինքնությունն իմաստ չունի առանց ժողովրդի։ Այդ իսկ պատճառով երկար տարիներ ի վեր՝ 1990-ական թվականներից, նման ծրագրեր իրականացնում ենք Արցախում: Մենք վերջերս պատերազմի պատճառով դժբախտաբար, Շուշիում մի քանի ծրագրեր կորցրեցինք՝ ճամբարը, մանկապարտեզը, «Շող» կենտրոնը: Այս այցելությունը, անշուշտ, ընտանեկան այցելություն է, որովհետև Արցախը մեր տունն է, այնպես որ, անպայման, այս պատերազմից հետո Ավետարանչականի ներկայութունը անմիջականորեն վերահաստատվեց այստեղ: Արդեն դեկտեմբերի 1-ին մեր ծառայության բոլոր դաշտերը բաց էին՝ Մարտակերտից մինչև Ստեփանակերտ և Ասկերան, նույնիսկ Շուշիի այդ ծրագրերը, որոնք կորցրեցինք, նորից վերահաստատեցինք այստեղ: Շատ ուրախ ենք, որ պետությունը մեզ տրամադրեց այս շենքը, շնորհակալ ենք և երախտապարտ»,- նշել է նա՝ հավելելով, որ շենքը կվերանորոգեն և մանկապարտեզի տեսք կհաղորդեն։ Նա հույս հայտնեց, որ երեխաների թիվը սպասվածից ավելին կլինի։
Ամերիկայի Հայ Ավետարանչական Ընկերակցության Արցախի ներկայացուցիչ Վիկտոր Կարապետյանը, խոսելով նախատեսված աշխատանքների մասին , ասել է, որ դրանք կմեկնարկեն պետական հրամանից անմիջապես հետո։ «Ստեփանակերտում Ավետարանչական ընկերակցության հովանու ներքո գործող մանկապարտեզը պետք է վերածենք «Շող» կենտրոնի բնակիչների համար: Իսկ նոր մանկապարտեզը կգործի այստեղ։Այս երկու փոփոխություններով կընդալյնվի Արցախում մեր ունեցած բազմազան ու բազմաշերտ գործունեությունը: Ավետարանչականը՝ իր բոլոր խավերով, արդեն տվել է արտոնությունը այս ծրագրի համար, և որևէ դժվարություն կամ արգելք չեմ տեսնում՝ սկսելու և շարունակելու այս ծրագիրը»,-հավելել է նա:
Ամերիկայի հայ ավետարանչական ընկերակցությունն Արցախում գործում է 1995 թվականից։ Հանդիսանալով բարեգործական կազմակերպություն՝ այն նպատակ է ընտրել ժողովրդին ծառայելու առաքելությունը: Այս շրջանակում Արցախում իրականացվում է մանկապարտեզների ծրագիրը՝ Շուշիում, Ասկերանում, Մարտակերտում և Ստեփանակերտում։ Իրականացնում է նաև սոցիալական օգնության տարբեր ծրագրեր։ Ինչպես պատերազմի ժամանակ, այնպես էլ հետպատերազմյան փուլում շարունակում է աջակցության ծրագրերը, նաև սկսել է սահմանամերձ գյուղերի աջակցության ծրագրեր։
