Բելգիայում բնակվող հայազգի թավջութակահար Սևակ Ավանեսյանի նվագը դեռ Շուշիի` գերության մեջ գտնվող Սուրբ Ղազանչեցոց եկեղեցու պատերի ներսում է։ Թավջութակահարը կրկին Արցախում է։ Եվ այսօր` մայիսի 28-ին, Ստեփանակերտում հանդիպել է Սայաթ-Նովայի անվան երաժշտական քոլեջի ուսանողների հետ:
Բելգիաբնակ թավջութակահար Սևակ Ավանեսյանը հանդիպել է Սայաթ-Նովայի անվան երաժշտական քոլեջի ուսանողների հետ
ՍՏԵՓԱՆԱԿԵՐՏ, 28 մայիսի, ԱՐՑԱԽՊՐԵՍ։ «Արցախպրես»-ի թղթակցի հետ զրույցում Ս. Ավանեսյանն անկեղծանում է, որ թեև հաճախ է այցելում Արցախ, բայց ամեն անգամ վիրավոր Շուշին տեսնելիս հոգու ցավը նկարագրել չի կարողանում։
«Ինչ վերաբերում է քոլեջի երիտասարդներին, նրանցից մի քանիսի կատարումները լսել և ուղղակի հիացած եմ։
Ամեն անգամ այստեղ գալով` փորձում եմ Արցախի շենացման համար մի լավ բան անել: Այս անգամվա այցս Արսեն Ջուլֆալակյանի նախաձեռնությամբ մարզահրապարակներ կառուցելու ծրագրով էր պայմանավորված։ Սա ևս մեկ առիթ էր շփվելու Արցախի երիտասարդների հետ: Այսպիսի ծրագրերը հնարավորություն են տալիս ոգևորություն առաջացնելու արցախցիների մեջ և կրկին հիշեցնելու, որ նրանք մենակ չեն: Մենք չենք կարող մեր կյանքը ապրել ինչպես եվրոպացին, մենք մեր ուսերին ունենք մեծ պարտականություն, մենք ապրում ենք մեր հերոս տղաների կորցրած կյանքի գնով և պարտավոր ենք այն ապրել արժանապատիվ։ Եթե ես լինեի այլ ազգի ներկայացուցիչ լինեի, հաստատ, հիմա այս գիտակցումը չէի ունենա, բայց քանի որ ես հայ եմ, դրանով ամեն ինչ ասված է»,- նշել է թավջութակահարը` իրազեկելով, որ ընթացիկ տարվա հուլիսի 18-31-ը Ստեփանակերտում կանցկացվի «Զարթոնք» ամառային երաժշտական-ստեղծագործական ակադեմիան՝ Հայաստանի, Արցախի ու Սփյուռքի պատանիների և երիտասարդների համար։ Ակադեմիայի գեղարվեստական ղեկավարն է ՀՀ ժողովրդական արտիստ, սոպրանո Հասմիկ Պապյանը։
Ակադեմիայի դասախոսական կազմում ընդգրկված են Հայաստանի ու Սփյուռքի լավագույն արվեստագետները և մասնագետները։
