Շախմատի աշխարհի 13-րդ չեմպիոն Գարի Կասպարովը անդրադարձել է Հայոց ցեղասպանության 100-րդ տարելիցին:
Պետք է ոճրագործությունն անվանել իր անունով. Գարի Կասպարով
ՍՏԵՓԱՆԱԿԵՐՏ, 24 ԱՊՐԻԼԻ, ԱՐՑԱԽՊՐԵՍ։ «Այսօր նշվում է Հայոց ցեղասպանության 100-րդ տարելիցը: Դժվար է հաշտվել դրա հետ, ինչպես՝ չարի բոլոր մեծագույն դրսեւորումների հետ, սակայն այդպիսին է իրականությունը: Չարիքն աճում է, երբ մենք վախենում ենք նայել դրա աչքերին եւ հրաժարվում ենք խոստովանել այդ. դա է փաստում պատմությունը: Մենք պետք է լինենք բավականաչափ ազնիվ ու խիզախ, որպեսզի ոճրագործությունն անվանենք իր անունով, հատակապես, երբ խոսքը 20-րդ դարի ցեղասպանությունենրի մոր՝ Հայոց ցեղասպանության մասին է:
2002-ին ես The Wall Street Journal-ում գրել էի հոդված՝ կոչ անելով Եվրոպական Միության կազմում Թուրքիային ընդգրկել մի շարք պայմանների իրագործումից հետո միայն: Ամենակարեւոր պայմանը Հայոց ցեղասպանության ընդունումն ու դրա վերաբերյալ լիարժեք հետաքննություն անցկացնելն էր: Այն, որ դա այդպես էլ տեղի չունեցավ, դարձավ մեծ հիասթափություն:
Ես դեռ հուսով եմ, որ դա տեղի է ունենալու: Ինչպես կարող ենք պայքարել չարի դեմ, եթե մենք խիզախություն չունենք պայքարել չարի ուրվականների դեմ, որոնց 100 տարին է արդեն լրանում»,- ֆեյսբուքյան էջում գրել է Գարի Կասպարովը՝ Թվիթերում ավելացնելով, որ «ինքն ու իր ընտանիքը, հարյուր հազարավոր այլ մարդկանց հետ, ստիպված են եղել 1990 թվականին հեռանալ Բաքվից՝ ջարդերից փրկվելու համար: Կասպարովը նշել է, որ այդպիսի հանցագործությունները վաղեմության ժամկետ չունեն։