Թուրքիայի խորհդրարանական ընտրություններին հետևող միջազգային դիտորդներն արձանագրել են, որ թեպետ եղել է մասնակցության բարձր մակարդակ, այդուհանդերձ ընտրական 10 տոկոսի շեմի առկայությունը մեծապես սահմանափակել է քաղաքական բազմակարծությունը:
ԵԱՀԿ դիտորդները կոչ են արել իջեցնել ընտրական տասը տոկոսի շեմը Թուրքիայում
ՍՏԵՓԱՆԱԿԵՐՏ, ՀՈՒՆԻՍԻ 8, ԱՐՑԱԽՊՐԵՍ-ԱՐՄԵՆՊՐԵՍ: ԵԱՀԿ տարածած հաղորդագրության համաձայն` դիտորդների գնահատականներով` մտահոգվելու առիթ են տալիս նաև Թուրքիայում ընտրությունների նախաշեմին լրատվամիջոցների ազատության սահմանափակումները: ԵԱՀԿ առաքելության ներկայացուցիչներն արձանագրել են կուսակցական գրասենյակների և ֆիզիկական անձանց վրա մեծ թվով հարձակումները: Հաղորդագրության մեջ նշվում է, որ ընտրությունները լավ էին կազմակերպված, սակայն թափանցիկության ավելի մեծ տոկոսը կարող էր հանգեցնել վստահության մթնոլորտի մեծացմանը:
ԵԽԽՎ Դիտորդական առաքելության ղեկավար Թայնի Կոքսը հորդորել է թուրքական իշխանություններին զգալիորեն նվազեցնել ընտրական տասը տոկոսի շեմը:
Դիտորդներն անդրադարձել են նախ նախագահ Էրդողանի ակտիվ մասնակցությանը նախընտրական քարոզարշավին, թեպետ սահմանադրական դրույթները նրան արգելում են այդպես վարվել:
Թուրքիայի խորհդարանական ընտրությունների քվեատուփերի 99,98 տոկոսի արդյունքները հրապարակված են: Դրանց համաձայն իշխող «Արդարություն և զարգացում» կուսակցությունը կորցրել է զգալի քվեներ և ստացել է ձայների ընդամենը 40,85 տոկոսը (258 պատգամավոր), Հանրապետական ժողովրդական կուսակցություն` 24,96 տոկոսը (132 պատգամավոր), «Ազգայնական շարժում» կուսակցությունը` 16,28 տոկոսը (80 պատգամավոր) և քրդական Ժողովուրդների դեմոկրատական կուսակցություն` 13,11 տոկոսը (80 պատգամավոր):
