«Առաջին անգամ եմ գտնվում Արցախում: Ես շատ բան չգիտեի Արցախի պատմության մասին»,- Արցախի պետական պատմաերկրագիտական թանգարանում, «Արցախպրես»-ի թղթակիցի հետ այսօր կայացած զրույցում նման խոստովանություն է արել ճապոնացի զբոսաշրջիկ, լուսանկարիչ Թայ Ուենոն:
Ինչո՞ւ են զբոսաշրջիկները նախընտրում Արցախը
ՍՏԵՓԱՆԱԿԵՐՏ, ՀՈՒԼԻՍԻ 21, ԱՐՑԱԽՊՐԵՍ:
«Շատ հետաքրքիր վայր է Արցախը։ Այստեղ գտնվելու իմ հիմնական նպատակը Արցախի պատմությանը, մշակույթին ծանոթանալն է և նրա բնակիչներին ճանաչելը: Միայն Ստեփանակերտում եմ եղել, և այստեղ ամեն ինչ ինձ դուր է եկել: Համտեսել եմ արցախյան ժենգյալով հացը, որը շատ համեղ է»,-նշել է Թ. Ուենոնը և հավելել, որ անպայման նորից կայցելի Արցախ՝ այս անգամ երկար ժամանակով, որպեսզի կարողանա լինել բոլոր տեսարժան վայրերում:
Իտալիայից ժամանած զբոսաշրջիկ Դումինկո Մարկաչին, ով նույնպես առաջին անգամ է Արցախում, նշել է. «Կարծում եմ, որ շատ հարուստ մշակույթ ունեք, որը զարգացրել եք դարեր շարունակ։ Վատ ժամանակներ են եղել Արցախի համար, Ձեր բնակիչները կարողացել են հաղթահարել բոլոր դժվարությունները և և պատերազմից հետո վերականգնել երկիրը»:
Դումինկո Մարկաչինի խոսքով՝ իր այցի գլխավոր նպատակն Արցախը տեսնելն ու խորապես ճանաչելն է, քանի որ մինչ այդ լիարժեք պատկերացում չի ունեցել Արցախի մասին:
«Արցախի պատմաերկրագիտական թանգարանը շատ հետաքրքիր էր: Գիտաշխատողը բովանդակալից ներկայացրեց Արցախի պատմությունը»,- գոհունակությամբ նշել է իտալացի զբոսաշրջիկը և հավելել, որ իրեն շատ են հուզել հատկապես հոգևոր մշակույթը և մարդկանց հյուրասիրությունը:
Արցախի պետական պատմաերկրագիտական թանգարանի տնօրեն Մելանյա Բալայանի խոսքով՝ ընթացիկ տարվա հունվար-հունիս ամիսներին թանգարանն ունեցել է 6115 այցելու, այդ թվում՝ 1095-ը արտերկրից: Ի դեպ, թանգարանը նախորդ տարվա նույն ժամանակահատվածում ունեցել է 6000 այցելու, որից 1657-ը՝ արտերկրից:
«Այցելուներ ունենք աշխարհի տարբեր վայրերից՝ ԱՄՆ-ից, Աֆրիկայից, Ճապոնիայից և այլն: Մեծ է նաև սփյուռքահայերի հոսքը դեպի թանգարան»,-ասել է Մ. Բալայանը:
Թանգարանի տնօրենի հավաստմամբ՝ այցելուների մեծ մասի նպատակն Արցախը տեսնելն ու ճանաչելն է:
«Սակայն քիչ չեն դիվանագիտական, քաղաքական, ինչպես նաև արցախյան հիմնախնդրին ծանոթանալու նպատակով Արցախ ժամանողների թիվը»,- նկատել է Մ. Բալայանը՝ հավելելով, որ, ինչպես զբոսաշրջիկներն են խոստովանում, իրենք փորձում են իրականության մասին օբյեկտիվ ու ճշմարիտ տեղեկություններ ստանալ հենց տեղում:
«Արահետ թրավել» ՍՊԸ հոգևոր զբոսաշրջային ընկերության էքսկուրսավար Լիլիթ Սարգսյանը նշել է, որ ինքը շատ հաճախ է օտարերկրացի զբոսաշրջիկների Արցախ ուղեկցում:
«Զբաղվում ենք հիմնականում հոգևոր զբոսաշրջությամբ և, որպես ուխտավայր Արցախը մեր երթուղում առաջիններից է: Այս անգամ մեր խմբում՝ ընդգրկված են 10-15 հոգի, որոնք հիմնականում իտալացիներ են: Շատերն էլ առաջին անգամ են Արցախում: Մեր երկրի մասին նրանց տեղեկացվածության մակարդակւ բարձրացնելու համար համակողմանի տեղեկատվության մատուցումը մեր առաջնահերթ խնդիրներից է, ինչի համար էլ էքսկուրսիան սկսում ենք պատմաերկրագիտական թանգարանից, որի ցուցանմուշները օգնում են ավելի լավ ճանաչելու Արցախն ու նրա պատմությունը»,- նշել է էքսկուրսավարուհին և ավելացրել, որ երկօրյա այցի ընթացքում իրենք կլինեն նաև Շուշիում, Գանձասարում, Ամարասում ու Դադիվանքում: