Արցախի քաղաքական դաշտում վերջերս ակտիվացել են խոսակցություններն՝ երկրի կառավարման ձևաչափի փոփոխության վերաբերյալ:
«Ազատ Հայրենիք»-ը կո՞ղմ է երկրի կառավարման խորհրդարանական ձևաչափին
Արցախի քաղաքական դաշտում վերջերս ակտիվացել են խոսակցություններն երկրի կառավարման ձևաչափի փոփոխության վերաբերյալ: Թե ինչ դիրքորոշում ունի իշխող քաղաքական մեծամասնությունը, այս առթիվ «Արցախպրես»-ը դիմել է Ազգային ժողովի փոխնախագահ, «Ազատ հայրենիք» կուսակցության համահիմնադիր Արթուր Թովմասյանին:
ԱԺ փոխխոսնակը, մասնավորապես նշեց, որ ԱՀ կուսակցության ներսում դեռ նման քննարկումներ չեն եղել, բայց գտնում է, որ խորհրդարանական կառավարման ձևաչափին անցնելու գաղափարն ավելի ընդունելի է: «Կարծում եմ՝ժամանակն է, որ Արցախում անցնենք երկրի կառավարման խորհրդարանական ձևաչափին, քանի որ այն հնարավորություն կստեղծի նոր որակական մակարդակի վրա դնել կայացման փուլում գտնվող քաղաքական դաշտը:
Միջազգային փորձը ցույց է տալիս, որ խորհրդարանական կառավարման ձևաչափում ժողովրդի մասնակցությունը երկրի կառավարման գործում ավելի ներկայացված է, և պետության համար կարևորագույն շատ հարցերում ավելի արդյունավետ որոշումներ կայացնելու հավանականությունը մեծ է: Բացի դրանից, երկրի զարգացման գործում, իմ խորին համոզմամբ, պետք է պատասխանատվություն կրի ոչ թե մեկ կամ երկու անհատ, այլ ժողովրդի վստահությունը շահած մի ամբողջ թիմ»,-ասաց Ա. Թովմասյանը՝ վկայակոչելով Իսրայելի օրինակը, որը Պաղեստինի հետ երկար տարիներ գտնվելով զինված հակամարտության մեջ, կառավարման խորհրդարանական ձևաչափով տարիներ շարունակ կարողանում է երկրում կայուն զարգացում ապահովել:
Նման փոփոխություններն, ըստ Թովմասյանի, հնարավոր են միայն երկրի սահմանադրության վերանայման արդյունքում: «Սակայն կարևորը ժողովրդի կարծիքն է. եթե լինի նոր հանրաքվե, և ժողովուրդն արտահայտի իր դիրքորոշումը, ապա ընդունելի կլինի այդ մոտեցումը»,-հավելեց Արթուր Թովմասյանը: