Հայ պրոֆեսիոնալ բռնցքամարտիկ, գերմիջին քաշային կարգում WBO վարկածով աշխարհի չեմպիոն Արթուր Աբրահամը շարունակում է պնդել, որ հաղթելու է հերթական մրցակցին:
Հաղթելու եմ, երկրորդ տարբերակ չկա. Արթուր Աբրահամ
«Ավելի քան երկու ամիս հետևողական պատրաստվել եմ այս մենամարտին: Այնպես որ, հիմա համոզված կարող եմ ասել, որ ամեն ինչ կարգին է, ես լիովին պատրաստ եմ մենամարտին և իհարկե, հաղթելուն: Այսուհանդերձ, ինչպես միշտ, այս անգամ էլ չեմ թերագնահատում մրցակցիս: Հաղթելու եմ: Երկրորդ տարբերակ չկա»,-«Արմենպրես»-ի հետ զրույցում ասաց Աբրահամը:
Նա խոսեց նաև մարզիչ Ուլի Վեգների մասին և փաստեց, որ գերմանացի մասնագետը իր հետ կլինի նաև մենամարտի ժամանակ. « Նա վերջերս ոտքի ջլի վիրահատություն է տարել, այս պահին մի քիչ դժվարությամբ է քայլում, բայց միշտ ինձ հետ է, իմ կողքին և այս մենամարտի ժամանակ էլ կողքիս կլինի»:
Արթուր Աբրահամի առաջիկա մենամարտը կայանալու է նոյեմբերի 21-ին, Գերմանիայի Հանովեր քաղաքի «TUI Arena»-ում: Մրցակիցն է 33-ամյա բրիտանացի Մարտին Մուրայը: Մենամարտը ցուցադրվելու է գերմանական SAT հեռուստաընկերության ուղիղ եթերում, նոյեմբերի 21-ին, սկիզբը` Գերմանիայի ժամանակով ժամը 22:20, նաև Հայաստանի հանրային հեռուստաընկերության ուղիղ եթերում, Հայաստանի ժամանակով` նոյեմբերի 22-ի լույս 23-ի գիշերը, սկիզբը` ժամը 1:20:
