Արցախի Հանրապետության վարչապետ Արայիկ Հարությունյանը հունվարի 2-ին աշխատանքային խորհրդակցություն է հրավիրել՝ առատ տեղումների պայմաններում ենթակառուցվածքների բնականոն սպասարկումն ապահովելու վերաբերյալ:
Արայիկ Հարությունյանը խորհրդակցություն է հրավիրել՝ առատ ձյան հետևանքները վերացնելու վերաբերյալ
ՍՏԵՓԱՆԱԿԵՐՏ, հունվարի 2, ԱՐՑԱԽՊՐԵՍ: ԼՂՀ կառավարության աշխատակազմի տեղեկատվության և հասարակայնության հետ կապերի բաժնի փոխանցմամբ՝ ԱՀ քաղաքաշինության և էկոնոմիկայի նախարարները, Ստեփանակերտի քաղաքապետը և այլ պատասխանատուներ ներկայացրել են ստեղծված իրավիճակը և իրականացվող աշխատանքները:
Քաղաքաշինության նախարար Կարեն Շահրամանյանի զեկուցմամբ՝ հանրապետական նշանակության բոլոր ճանապարհներն անցանելի են: Նախարարի խոսքով՝ «Արցախուղի» ընկերության ամբողջ տեխնիկան միջշրջանային ճանապարհներին իրականացնում է ձնամաքրման աշխատանքներ: «Սաստիկ բուքի պատճառով փակ է միայն Քարվաճառ-Սոթք ճանապարհը, իսկ «Վահե Կարապետյան» ընկերության կողմից համապատասխան աշխատանքներ են իրականացվում Ստեփանակերտ-Գորիս միջպետական մայրուղին բաց պահելու համար»,- նշել է Կ. Շահրամանյանը:
Վարչապետը, ընդհանուր առմամբ, բավարար է գնահատել կատարված աշխատանքները՝ կարևորելով շուրջօրյա վերահսկողության պահպանումը: «Անհրաժեշտ է հնարավորինս արագ վերացնել բոլոր խնդիրները և հատկապես հիմնական ճանապարհները դարձնել ոչ միայն անցանելի, այլև՝ երթևեկության համար անվտանգ: Հատուկ ուշադրություն դարձրե՛ք Մարտակերտ-Վարդենիս ճանապարհի մաքրման վրա և լրացուցիչ ուժեր ներգրավե՛ք այդ գործում»,- հանձնարարել է Ա. Հարությունյանը:
Ստեփանակերտի քաղաքապետ Սուրեն Գրիգորյանի տեղեկացմամբ՝ փողոցների ձնամաքրման աշխատանքներն ընթացքում են: Նա հավելել է, որ Ստեփանակերտում փակ ճանապարհներ չկան, սակայն մայթերը և շենքերի բակերը շարունակում են հետիոտնի համար դժվարանցանելի մնալ:
Էկոնոմիկային նախարար Անդրանիկ Խաչատրյանի զեկուցման համաձայն՝ վերջին օրերին հանրապետության տարածքում տեղացած առատ ձյան պատճառով որոշ գյուղերում էլեկտրաէներգիայի մատակարարման կարճ խափանումներ են տեղի ունեցել: ««Արցախէներգո» ընկերության աշխատակիցները արագ վերացրել են տեխնիկական խնդիրները և այժմ ևս շարունակում են մի շարք բնակավայրերում նման աշխատանքներ իրականացնել: Ներկայումս հանրապետության գրեթե բոլոր բնակավայրերը կանոնավոր կերպով էլեկտրական հոսանք են ստանում»,- նշել է Ա. Խաչատրյանը:
Վարչապետն ընդգծել է, որ առաջիկա օրերին սպասվող ցրտերով պայմանավորված՝ էլեկտրական ցանցերի ծանրաբեռնվածությունն աճելու է, հետևաբար, պետք է այդ ուղղությամբ մեծացնել ուշադրությունը՝ հնարավոր խափանումներից խուսափելու համար: «Բնագավառի համապատասխան աշխատողների համար ապահովե՛ք բոլոր պայմանները, որպեսզի նրանք, ըստ պատշաճի, վերահսկեն իրավիճակը, և բնակչությանը անխափան էլեկտրաէներգիա մատակարարվի»,- հանձնարարել է Արայիկ Հարությունյանը:
