Միգրացիոն ճգնաժամի ֆոնին Եվրոպայի ներսում սահմանների փակումը կարող է բացասական հետեւանքներ ունենալ Եվրամիության համար:
Մերկելը զգուշացրել է ԵՄ-ի ներսում սահմանների փակման վտանգավորության մասին
ՍՏԵՓԱՆԱԿԵՐՏ, փետրվարի 6, ԱՐՑԱԽՊՐԵՍ: Այս մասին ամենշաբաթյա տեսաուղերձում հայտարարել է Գերմանիայի կանցլեր Անգելա Մերկելը: Այն հրապարակվել է երկրի կառավարության կայքում:
«Մենք պետք է պաշտպանենք մեր արտաքին սահմանները, քանի որ ցանկանում ենք պահպանել Շենգենը: Եթե չկարողանանք պաշտպանել մեր արտաքին սահմանները, ապա ներքին շուկայի շրջանակում այդ ազատ տարածքը՝ մեր բարեկեցության հիմքը, կվտանգվի: Հարկավոր է կանխել դա: Կարծում եմ՝ ԵՄ անդամ բոլոր երկրները կիսում են այս տեսակետը»,- ասել է Մերկելը:
Ըստ ՏԱՍՍ-ի, ներկայում ԵՄ-ի ներսում մի շարք սահմաններին սահմանային վերահսկողություն է իրականացվում՝ միգրանտների անկառավարելի հոսքը մասամբ կանխելու համար: ԵՄ-ն միգրացիոն ճգնաժամից ելքը համարում է Թուրքիայի հետ համագործակցությունը, որի սահմանով բազմաթիվ փախստականներ անցնում են Հունաստան, այնտեղից՝ ԵՄ այլ երկրներ: Անկարային 3 մլրդ եվրո են խոստացել, որպեսզի այն ավելի լավ պահպանի սահմաններն ու կանխի օտարերկրացիների ապօրինի հոսքը:
