Միգրացիոն ճգնաժամի ֆոնին Հունաստանի վարչապետ Ալեքսիս Ցիպրասը սպառնացել է արգելափակել Եվրամիության բոլոր որոշումները։
Հունաստանը սպառնում է արգելափակել ԵՄ-ի որոշումը
ՍՏԵՓԱՆԱԿԵՐՏ, փետրվարի 25, ԱՐՑԱԽՊՐԵՍ: Աթենքը «հավանություն չի տա ոչ մի համաձայնության այնքան ժամանակ, քանի դեռ ծանրաբեռնվածությունն ու պատասխանատվությունը հավասարաչափ չեն բաշխվել» Եվրամիության երկրների միջև, հայտարարել է Ցիպրասը, փոխանցում է Корреспондент-ը:
Նա ընդգծել է, որ կառավարությունը թույլ չի տա երկիրը վերածել բուֆերային գոտու մարդկանց կուտակումների համար:
Ցիպրասը մտադիր է ԵՄ-Թուրքիա գագաթաժողովից առաջ, որը նախատեսված է մարտի 7-ին, հանդիպել հունական բոլոր կուսակցությունների ներկայացուցիչների հետ, որպեսզի համաձայնեցնի միգրացիոն ճգնաժամում ընդհանուր դիրքորոշման առաջխաղացմանն ուղղված քայլերը։
Ավելի վաղ հույն վարչապետը հեռախոսային բանակցություններ է ունեցել Գերմանիայի կանցլեր Անգելա Մերկելի հետ, որի ընթացքում «խոր դժգոհություն» է հայտնել այն կապակցությամբ, որ չեն կատարվել բոլոր պայմանավորվածությունները, որոնք ձեռք էին բերվել փետրվարի 18-ին ԵՄ-ի գագաթաժողովի ժամանակ։
