«Ես անմիջապես մեքենայով դուրս եկա գյուղ, որպեսզի արագ կազմակերպեմ բնակչության տարհանումը: Երբ արդեն գյուղի կենտրոնում էի, կանգնեցրեցի մեքենան, զրուցում էի համագյուղացիների հետ, երբ մեր գյուղի վրա եկավ առաջին արկը: Ես տղերքին անմիջապես հորդորեցի նստել մեքենաներն ու գյուղից որքան հնարավոր է արագ հանել երեխաներին ու կանանց: Ես էլ իմ մեքենան նստեցի, դեռ մի քանի մետր էի առաջ շարժվել, երբ երկրորդ արկը եկավ գյուղի վրա: Այդ արկը հետևի կողմից կպավ իմ մեքենային, դրա բեկորներից էլ ես վիրավորվեցի»,- նշել է Ավանեսյանը:

Նա պատմել է, որ հիշում է՝ վիրավորվելուց հետո մեքենայից դուրս է եկել, ընկել գետնին, գլուխն արնահոսել է: «Այդ պահին հակառակորդն անընդհատ կրակի տակ էր պահում գյուղը, տարբեր տեղեր արկեր էին պայթում: Ես անմիջապես զանգեցի բնակիչներին, հայտնեցի, որ վիրավոր եմ, հետո սողեսող գնացի մոտակայքում ապրող իմ ընկերներից մեկի տուն: Հետո, երբ կրակոցները դադարեցին, իմ ընկերներից մեկն ինձ հասցրեց Ստեփանակերտի հիվանդանոց: Դրանից հետո բնակիչները, մեկը մյուսին իմաց տալով և օգնելով, երեխաներին և կանանց տարհանել են գյուղից»,- պատմել է գյուղապետը:

Ավանեսյանը հայտնել է նաև, որ Մատաղիսից ևս երկու հոգի վիրավորվել են հակառակորդի ռմբակոծության հետևանքով: Նրանցից մեկը Կամո Աբրահամյանն է, ով ևս բուժում է ստանում Ստեփանակերտի Հանրապետական հիվանդանոցում, իսկ մյուսը Անդրանիկ Առաքելյանն է, ով վիրավորվել է զորամասում աշխատելու ընթացքում:

Նա վստահեցրել է, որ ապաքինվելուց հետո անպայման գյուղ է վերադառնալու: «Պարզ չի՞, որ պետք է վերադառնամ: Մենք որ մեր գյուղ չվերադառնանք, ո՞վ պետք է վերադառնա: Ոչ ոք չի կարող ասել, որ գյուղից տարհանված բոլոր բնակիչները կվերադառնան, բայց հաստատ կարող եմ ասել, որ իմ վերադառնալուց շատ բան է կախված»,- հավելել է Ավանեսյանը:

Նրա խոսքով՝ Մատաղիսի բնակիչներից որևէ մեկն Արցախից դուրս չի եկել: Բնակչության մի մասը գտնվում է Արցախի տարբեր գյուղերում, մի մասն էլ Ստեփանակերտում: Զավեն Ավանեսյանը նշեց, որ այս պահին Մատաղիսում իրականացվում են համապատասխան վերականգնողական աշխատանքներ: