Այսօր բազմաթիվ արցախցիներ այցելել են Ստեփանակերտի Զանգակատուն-հուշակոթող և իրենց հարգանքի տուրքն են մատուցել 1915 թվականին Օսմանյան Թուրքիայի կողմից իրականացված Հայոց Ցեղասպանության անմեղ զոհերի հիշատակին:
Արցախցիները վճռական են՝ շարունակելու պայքարը հանուն Հայոց ցեղասպանության դատապարտման և Արցախի անկախության
ՍՏԵՓԱՆԱԿԵՐՏ, 24 ապրիլի, ԱՐՑԱԽՊՐԵՍ: «Արցախպրես»-ի թղթակցի հետ զրույցում արցախահայության տարբեր սերնդի ներկայացուցիչները խոսել են հանուն Հայոց ցեղասպանության դատապարտման, պահանջատիրության և Արցախի անկախության, մինչև վերջ պայքարելու վճռականության մասին:
Սարգսյան Ալվարդ–Մեր գոյատևման համար մեծ խնդիր է դարձել Օսմանյան Թուրքիայի ցեղասպան քաղաքականությունը, որն այժմ շարունակում է նաև Ադրբեջանը: Մենք պարտավոր ենք մեր կոչերով փորձելու աշխարհին ներկայացնել ճշմարտությունը և ցույց տալու Ադրբեջանի հայատյաց քաղաքականությունը, որը Թուրքիայի քաղաքականության շարունակությունն է: Թուրքն իր ձեռագիրը չի փոխել, մնացել է նույն ցեղասպանը, որը պետք է դատապարտվի ամենախիստ կերպով:
Էմիլ Բալայան՝ Արցախի վաստակաշատ մանկավարժ, Արցախյան շարժման ակտիվ մասնակից- Թուրքի ձեռագիրը չի փոխվել: Ադրբեջանի ապրիլյան ագրեսիայի ընթացքում կատարված հանցագործություններն այդ մասին են վկայում: Չեմ կարծում, որ այն ինչ տեղի ունեցավ վերջին ոտնձգությունն է հայ ժողովրդի նկատմամբ: Մենք անգնահատելի կյանքեր ենք կորցրել: Եթե նրանք չլինեին ապա գերեզմանաքար պետք է դնեինք ամբողջ Արցախի վրա: Այստեղ թաղված է Մարտակերտի զորագնդի հրամանատար Նորիկ Դանիելյանը՝ իմ բանտակից ընկերը ադրբեջանական տարբեր բանտերում: Հոտագայում նա փոխանակման միջոցով վերադարձավ և իր կյանքը զոհեց հանուն հայրենիքի պաշտպանության սուրբ գործի:
Աստիճանաբար աշխարհը գնում է Ցեղասպանության հարցի լուծմանը, բայց միշտ էլ այդ անտարբերությունը եղել է և հենց աշխարհի լուռ աչքի առաջ Արևմտյան Հայաստանի ամբողջ հայությունը սրի քաշվեց: Այսօր էլ Աշխարհը անտարբերություն է դրսևորում ադրբեջանցի վայրագների նախահարձակ ու սադրիչ գործողությունների նկատմամբ: Մեր ժողովուրդն ամբողջ կյանքում պայքարել է ու անցել բազում դժվարությունների միջով: Պետք է շարունակել մեր պայքարը այնքան, որպեսզի Արցախը դառնա լիովին անկախ , որից հետո Արաքսից այն կողմ Արևմտյան Հայաստանն է մեզ սպասում:
Վլադիմիր Գրիգորյան` «Հայկի սերունդ» հասարակական կազմակերպության փոխնախագահ- Հայոց Ցեղասպանության 101-րդ տարելիցի կապակցությամբ մենք եկել ենք մեր հարգանքի տուրքը մատուցելու անմեղ զոհերի հիշատակին: Մենք պահանջատեր ենք ու մինչև վերջ պայքարելու ենք՝ Թուրքիայի կատարած հանցագործության մասին ճշմարտությունն ապացուցելու, թե միջազգային հանրությանը, թե ամբողջ աշխարհին: Մենք ականատես ենք եղել , թե ինչպես ապրիլյան քառօրյա պատերազմում ոճրագործ ու ցեղասպան թուրքը նույն կերպ վարվեց: Հպարտությամբ կարող եմ նշել, որ այս անգամ մեր հերոս տղաները կանխեցին մի նոր ցեղասպանություն: Լինելով միասնական մենք ամեն կերպ պայքարելու ենք մեր ճշմարտության համար: Վստահ եմ, որ հասնելու ենք մեր նպատակին: Այսօր էլ հայությունն Արցախում շարունակում դիմակայել թշնամուն: Հայոց բանակի զինվորները թշնամու ապրիլյան ագրեսիայի օրերին հրաշքներ գործեցին և նորից աշխարհին ապացուցեցին , որ հայ մարդը պատրաստ է սեփական ճակատագիրը կերտելու իր ձեռքով , և որ հայը հույսը չի դրել աշխարհի գերտերությունների վրա:
